Eemilliona N$87 kopologalama yokutunhila oimuna
Ouministeli wounamapya, omeva netulululo lomadu owa tula poshitaafula oshimaliwa shemilliona N$87 tadi ka longifwa kopologalama yokutunhila oimuna. Edi oda popiwa kumupeduminista wounamapya Anna Shiweda Omaandaxa pefimbo a li ta yandje ouyelele nghene oshimaliwa shomutengenekwafaneko osho va pewa neudo tashi ka longifwa. Omudo wa dja ko opologalama yokutunhila oimuna okwa li ya pewa oshimaliwa sheemilliona N$82. Naashi otashi ulike kutya oshimaliwa neudo shokopologalama yokutunhila oimuna osha wedelwa neemilliona N$4.9 mokufaafanifa nomudo wa dja ko. Shiweda okwa ti opologalama yomayakulo okutunhila oimuna oyo imwe ya fimana moshilongo molwaashi otai kelele oimuna iha kwatwe komikifi. Okwa ti ouministeli wavo otau twikile nokuyandjaneke omayakulo okutunhila oimuna koitukulwa aishe shaashi oimuna oya fimana kovanhu. “Oimuna otai yambula po eliko loshilongo tashi pitile momangeshefelo meni nokondje yoshilongo,” ta ti. Okwa ti eengobe 541 390 oda tunhilwa omukifi wekondo nelaka omanga eengobe 604 138 da tunhilwa omukifi wepunga. Okwa weda po ta ti ovanafaalama ve li koitukulwa ya yooloka okwa li va pewa ouyelele nehongo kombinga nghene ve na okutunhila eengobe davo koumambo. Shiwedha okwa ti ouministeli wavo owe shi pondola okutunga outomenho koitukulwa ngaashi Omusati, Ohangwena noZambezi. “Elalakano loutomenho opo ovanhu va mone omhito yokulandifa eengobe davo noshoyo okutuma ombelela kondje yoilongo. Okwa ti oshimaliwa shimwepo otashi ka longifwa okutunga oupangelo voimuna koitukulwa, okulongulula eenhele dokutunhila oimuna nosho tuu omayakulo amwepo a yooloka a pumbiwa.