Aalongisikola yaa na iilonga ya inika komilungu nuuministeli

Omalongekidho gokuyunga ontanda poombelewa dhelongo kaalongwantu yuulongelweithano lyuulongisikola inaga vula we okuya komeho sho uuministeli wa kala omutumba naalongwantu mbaka.

Aalongwantu oya li taya ilongekidha oku ka yunga ontanda sho ya mono inaaya yamukulwa konima yehololomadhiladhilo ndyoka ya ningile omumvo gwa zi ko.

MuNovomba, omangungo gaalongi inaaya mona iilonga oga li ga ningi ominyanyo oshilongo ashihe taya pula opo uuministeli wu ya kute miilonga.

Oya li taya pula opo epangelo lyi tule miilonga omulandu ngoka tagu utha kutya kehe omulongi na kale ta longo aanona yangapi poshikando. Oya li ya pula wo opo uuministeli wu kuthe po omulandu gwokuningila aalongi omapulapulo opo ya kutwe miilonga ko ku galulwe omukalo gwa li tagu longitwa pethimbo lyoCovid-19, mpoka pwa li aanona yamwe haya yi kootundi dhongula nayamwe okomatango.

Omupopiliko gwaalongwantu mbano David Nekaro okwa lombwele Nampa mEtitatu kutya omunambelewa muuministeli ngoka ya yi naye

moonkundaathana, omukuluntuwiliki wuuministeli Sanet Steenkamp, ngoka a li oye omunashipundi gwomutumba.

“Oshinima oshinene shoka twa kundathana oshomwaalu gwaalongwa taya longwa komulongi gumwe pethimbo limwe. Otwa tsu kumwe opo ku talike omiyalu dhaanasikola posikola kehe oshoka monakuziwa uuministeli owa li

tawu patulula oomhito dhiilonga tawu tala komiyalu dhaanasikola pashitpolwa ndele hakoosikola,” ta ti ngaaka.

Omutumba ogwa li wo gwi ikundu opo ondondo yopre-primary yi tambulwe ko muuninisteli oshoka mongashingeyi ondondo ndjoka kayi li pambelewa.

Taya pula etemo... Aalongwantu ya yi moonkundathana nuuministeli welongo.