Eemilliona N$422.7 tadi ka longifwa okuyandjaneka omeva
Minista wounamapya, omeva nomatululo omadu Calle Schlettwein okwa ti eemilliona N$422.7 otadi ka longifwa okayandjaneka omeva koitukulwa ya yooloka unene tuu komikunda.
Edi minista okwe di popya Omaandaxa komutumba wa li keembelewa davo moWindhoek.
Ovanambelewa va dja koikondo ya yooloka okwa li va ngudumana komutumba ou okukufa ombinga nokutopolafana ouyelele kombinga yomayakulo ouminiteli.
Minista okwa popya ta ti ombelewa yaye otai ka yandja oshimaliwa shokutunga eedama domeva 40 koitukulwa ya yooloka moshilongo.
Shlettwein okwa ti omino dimwepo domeva koitukulwa ngaashi Kavango West noshotu otadi ka longwa.
Okwa ti ouministeli wavo otau ka tunga yoo vali eembola domeva komikunda opo ku kwashipalekwe kutya oshiwana otashi nu omeva ayela.
“Osha fimana ngeenge ovanhu tava nu omeva ayela opo ku kelelwe omikifi odo ha di dulu okuetwa komeva a kaka. Elalakano louministeli wetu okuyandjaneka omeva koshiwana,” ta ti.
Minista okwa ti ombelewa yaye oya didilika omhumbwe yomeva koitukulwa imwepo omanga oitukulwa imwepo oya tungilwa eembola domeva ashike ohadi di omeva alula. “Ohatu ka kala twa ningila eembola dina omeva alula omapekapeko nghene omukundu ou tau kandula po molwashi oshiwana ina shi pumbwa okunwa omeva alula,” ta ti.
Okwa hokolola ta ti omeva okwa fimana shaashi oha hambula po oshikondo shounamapya ngaashi okulongifa moikunino noshoyo okunuwa koimuna.
“Omeva otaa twikile nokudana onghandangala ya kula mokuhambula po eliko loshilongo,” ta ti. Okwa ti ngeenge pena omeva ota shi yandje omhito koshiwana okutotapo oikunino younamapya nokonima otashi pitike oshiwana shi landifa oikunomwa yavo.
“Omeva otaa lwifa ondjala noluhepo unene tuu ngeenge taa longifwa koshikondo shounamapya. Ngeenge ka pena omeva omunhu ita dulu okukala ta nwefa oimuna yaye ile ta tekele moshikunino shaye,” ta ti.