Omukiintu a dhipaga omukiintu omukwawo noombele

Omukiintu gwomimvo 41 okwa tegelelwa a holoke mompangu yOndjiwarongo oshiwike shika ko nima a tsu omukiintu omukwawo gwomimvo 50 noombele e ta si.

Sha ikolelela kepeko lyopolisi oshiningwanima osha holoka Omandaaha lwopotundi 15h00 pehala lyomanwino tali ithanwa Flamingo kolukanda DRC kOtjiwarongo.

Otaku hokololwa nakufekelwa okuli moshipangelo natango miikaha yopolisi sho a monithwa oshiponga ku nakusa. Otaku hokololwa kutya nakusa okwali e na okakuwa okashona peke pethimbo taya dhengathana, shoka anuwa shali sha thiminike nakufekelwa a kuthe ombele nelalakano lyokwiigamena.

Naku fekelwa anuwa okwali a tsu nakusa iikando oyindji, nokwali a hulitha ethimbo olyo tuu ndyoka.

Shoka sha e ta enyenyeto ina shi tseyika natango. Oshiningwanima inaashifathana, omupolisi gwomukiintu okwayaha omufuthi gumwe e ta si omanga gumwe a matuka po sho kwali taya kambandhala okumuyuga iinima ye ethimbo kwali ta ningi omadhewo. Omugandji gomauyelele gwopolisi yaNambia Elifas Kuwinga okwa ti oshingingwanima osha holoka kOlympia koWindhoek koongula sha dhoSoondaha.

Otaku hokololwa kutya omukiintu ngoka okwa ponokelwa pethimbo ta galukile kegumbo sho aalumentu mboka yaali gumwe e na ekatana omanga gumwe e na ombele ya li btaya kambandhala okumuyuga.

Omukiintu ngoka anuwa okwali a kutha mo ondjembo ye, e ta yaha iikando ine no holo yimwe oya yaha omufuthi gumwe e ta si ethimbo olyo tuu ndyoka.

Omufuthi omukwawo okwali a matukile mohauto tayi tengenekwa yili pamwe naafuthi mboka.

Ngoka a matuka po ina mangwa natango. Opolisi moshitopolwa shaKhomas natango oyili molukongo lwaalumentu yaali mboka ya yugu aakiintu yatatu ohauto oshowo iinima yawo pethimbo kwali yaka ninga omadhewo koondundu.

Sha ikolelela kepeko lyopolisi lyiiningwanima ya holoka mehuulilo shiwike oshiningwanima shoka osha holoka lwopotundi 19h00 Etitano koondundu dhili popepi noAuas Blick koWindhoek. Otaku hokololwa kutya aantu mboka yatatu okwali ya ka enda koondundu.

Sho anuwa kwali taya galuka ko yuuka pohauto yawo, okwali ya mono aalumentu yaali gumwe a homata ondjembo omanga gumwe ena ombele, taye ya lombwele ya kankame. Aalumentu mboka anuwa okwali ya dhenge, etaya mona oshiponga. Okwa lopotwa kutya aakiintu mboka oya kuthwa oongondhi dhawo, oongaku oshowo ooshapi dhohauto etaye ya lomwele ya shune moondundu moka ya zi.

Aafuthi mboka anuwa okwali ya hingi po ohauto. Ohauto oyedhina Toyota Corolla Quest, inayi monika natango. Opolisi otayi indile oshigwana kehe ngoka ena uuyelele kombinga yoshiningwanima shoka opo a lopotele opolisi yili po pepi naye.