Hamunyela: Okukala modolongo kaku shi exulilo lounyuni
OLUNO - Omukulunhu koshikondo sheedolongo Raphael Hamunyela okwa kumaida ovanadolongo ta ti okukala modolongo hako exulilo lounyuni. Okwa ti okukala modolongo ehandukilo lopokafimbo hali pewa omunhu ngeenge a monika ondjo komhangu. Edi Hamunyela okwe di popya pefimbo a talela po endiki levyulonghalo kOluno Etivali. Hamunyela okwa li yoo vali a ninga omutumba noilyo yokomitiye yovakwashiwana tava longo okutonatela endiki laLuno. Oilyo yokomitiye okwa li ya tumbulekwa konima eshi ya pewa eedjapo molwaashi tai longo nawa okukwatela komesho evyulonghalo laLuno. Hamunyela okwa talela po omihandjo dovanadolongo ovakainhu novalumenhu nelalakano lokukundafananavokombingayomashongo a taalelwa kovanadolongo. Pefimbo lomutumba okwa popya ta ti okwa pandula oilyo yokomitiye eshi tai twikile nokulongela kumwe novanambelewa kevyulonghalo mokuyambidida ovanadolongo. “Elalakano loilyo yokomitiye okuyandja omayelele nghene ovanadolongo ve na okuyambididwa noshoyo okutalela po evyulonghalo opo va didilike omashongo,” ta ti. Okwa yelifa ta ti oilyo yokomitiye oya fimana komavyulonghalo molwaashi otai eta elunduluko liwa kovanadolongo. Hamunyelaokwakumaidaovanadolongo opo ve lihumbate nawa nokukala ve na ombili na vakwao. “Natango omwa pumbiwa moshiwana. Ngeenge eedula deni dehandukilo da pu ko indeni mu ka longe oilonga iwa ndele hakuendulula omapuko,” Hamunyela ta ti. Okwa lombwela ovanadolongo opo va kale ve na ekwatafano liwa novanambelewa tava longele kevyulonghalo. Naashi otashi eta ovanadolongo opo va kale tava lopotele ovanambelewa ngeenge pe na oupyakadi wonhumba. Hamunyela okwa ti ombelewa oya didilika omashongo a yooloka a taalelwa kovanadolongo komavyulonghalo. “Ohatu twikile nokukwashipaleka kutya ovanadolongo ove na oipumbiwa ngaashi oikulya, eembete nomakumbafa nosho tuu,” ta ti. Hamunyela okwa popya ta ti komavyulonghalo oku na oikulya ya wanena ovanadolongo. “Fiyo opapa inandi mona olopota ya dja komavyulonghalo shaashi kuhe na oikulya. Out na oshisho novanadolongo vetu efimbo keshe,” ta ti.