A dhipaga mukwawo sho anuwa te mu logo
KoDordabis moshitopolwa shaKhomas, omulumentu gwoomvula 42, Ndjamba Paulus, okwa si eso lyi nyanyaleka sho a dhengwa noshitenda komutse komufekelwa gwoomvula 35. Oshiningwanima shika osha holoka ongula yOsoondaha.
Anuwa omufekelwa, ngoka a mangwa po komiya dhaShinana noku li mokakuma ngashiingeyi, okwa li a kwata ondjuhwa komulungu ongula yOsoondaha nokuya kondunda yaPaulus, a yi ko a homata oshitenda shoka e mu dhengitha, oshoka anuwa ote mu logo.
Nakudhengwa okwa li i ihata po nokuya komukunda gwaNdingoya, opolisi oya ti okwa li a tsikile nokudhenga Ndjamba natango noshitenda, osho wo nondhopi komutse.
Sho a longo iikulumanene mbika, nakufekelwa okwa li a ningi onkambadhala yokuya ontuku, ashike okwa li a kwatwa koombushe miilonga yopofaalama mpoka yedhina Graswerd, mboka ya li ya dhengele omakootili.
Aapambele yanakusa oya tseyithilwa nomakonakono gopolisi oge li metifa. Moshiningwanima shi ili, shonkambadhala yedhipago, epeko lyopolisi olya hokolola oshiningwanima tashi halutha, sha holoka mUupopo mOndangwa.
Omufekelwa goomvula inaadhi thamunwa okwa li a yi anuwa moontamanana namukwawo, ashike oya li ya yiwa pokati kaantu. Konima yethimbo, omufekelwa okwa li a galuka a homata ekatana, ndyoka a li a longitha okuteta mukwawo kekutsi, ndyoka konyalanyala anuwa lya li lyi gwe ko thilu.
Nonando ongawo, omufekelwa anuwa naye okwa li wo a tsuwa noshinmima kaashi shiwike. Omakanda agehe gaali ngaka oga li ga falwa ga ka mbywangwaambywangwe koshipangelo shaNandjokwe, noga lalekwa mo ngashiingeyi.
Olopota yopolisi otayi ti omakonaakono otaga tsikile.