Oshiwana tashi ka pewa oukalata voshikukuta
WINDHOEK - Ombelewa yOmuprima otai ka longifa omukalo woukalata okuyandjaneka oikulya koshiwana.
Omupopiliko mombelewa yOmuprima Maxmus Halwoodi okwa ti oshiwana otashi ka pewa oukalata ve na oimaliwa ovo tava ka longifwa okulanda oikulya meefitola.
Halwoodi okwa yelifa ta ti ombelewa yavo itai ka longifa vali eeloli okutwala oikulya koitukulwa.
“Ohatu ka longifa ovanangeshefa ve na eefitola odo hadi landifa oikulya opo ovanhu va pewa oukalata va lande oikulya meefitola odo,” ta ti. Halwoodi okwa ti eengeshefa odo oda pumbwa okulishangifa nouministeli womangeshefelo opo di dule okulongifwa.
“Ongeshefa nai kale i li moshikandjohoololo omo mu na ovanhu va pewa oukalata vokulanda oikulya. Omunhu keshe otaka landa ashike oikulya kongeshefa oyo i li moshikandjohoololo shavo,” ta ti ngaho.
Okwa ti omukalo wokulongifa oukalata owa tameka nale moshikandjohoololo shaKatana moshitukulwa shaShana.
“Omaumbo 1 200 moshikandjohoololo omo okwa tameka nale okulanda oikulya noukalata,” ta ti.
Okwa ti paife ove lipyakidila
nokuninga omapekapeko koshikandjohoololo shaNgwediva nghene oukalata dava ka yandjwa.
“Oitukulwa aishe otai ka longifa omukalo woukalata. Oukalata otau ka longifwa omwedi keshe,” ta weda po.
Halwoodi okwa hokolola ta ti elalakano lokulongifa omukalo woukalata opo ku kelelwe omukundu woyeendifo tai teka ngeenge ya humbata oikulya.
“Otashi kwafele oikulya i fike pefimbo shaashi ovanhu paife otava ka landa oikulya keefitola di li momikunda davo,” ta ti.
Halwoodi okwa ti omaumbo itaa ka pewa vali oukutu voufila vee12.5kg ashike otaa ka pewa oukutu voufila vee20kg.
“Ovanhu otava ka pewa eendooxa deeshi nhee nomakende omaadi,” ta ti.
Okwa ti epangelo otali lalakanene
okulwifa ondjala tashi pitile mokuyandja okulya koshiwana.
“Oshi li oshinakuwanifa shombelewa yOmuprima okukwashipaleka kutya omaumbo a dengwa koshikukuta okwa pewa oikulya,” ta ti.
Halwoodi okwa indila ookansela koikandjohoololo ya yooloka opo va yandje omadina omaumbo oo e na ovanhu ve li momhumbwe yoikulya.-fhamalwa@nepc.com.na