Ndeitunga a kumaida oshiwana shi filafane oshisho
Ngoloneya woshitukulwa shaHangwena Sebastian Ndeitunga okwa kumaida oshiwana opo shi kwafele ovanhu ve li momhumbwe yoikulya.
Edi Ndeitunga okwe di popya pefimbo a ninga omutumba noshiwana koshikandjohoololo shaKongo Etitatu.
Ngoloneya okwa li yoo a shakena novaleli vopamifyuululwakalo, opolifi novafitaongalo opo va kundafane kombinga yomashongo a taalelwa koshiwana shaKongo.
Okwa ti ope na ovanhu vamwe ve na ovashiinda shavo tava tale omundilo ashike ovashiinda ovo va mona sha momapya otava tale ashike vakwao tava dengwa kondjala.
Okwa kumaida oshiwana opo shi kale shi na oushiinda muwa, ombili nelongelokumwe.
“Kaleni tamu yambididafana novashiinda sheni ngeenge ve li moluhepo unene momhumbwe yoikulya,” Ndeitunga ta ti.
Okwa ti osha fimana ngeenge ovanhu ve na oushiinda muwa molwaashi otashi kaleke po ombili nekwatafano liwa. Okwa lombwela oshiwana opo shi longele kumwe okulwifa oimbuluma momikunda davo unene tuu omahepekafano omomaumbo, opaukashikekookanhu noumbudi woimuna.
“Longeleni kumwe okulopa omahepeko omomaumbo. Xulifei po okuholeka ovakwapata veni ngeenge va longa oimbuluma,” ta ti.
Ndeitunga okwa ti ombelewa yaye otai twikile okulongela kumwe nouministeli wounamapya nomeva okukundafana kombinga yomhumbwe yomeva mOkongo.
Okwa popya ta ti ombelewa yaye oya lopotelwa kombinga yovakwashiwna tava teya po eemboola domeva mOkongo.
“Omunhu keshe ta teya po eembola domeva na lopotwe opo a pewe ehandukilo lopaveta,” ta ti.
Pefimbo lomutumba Ndeitunga okwa kumaida oshiwana opo shi ke lishangife oukalata vokuhoolola.
Okwa ti osha fimana ngeenge ovanhu ve na oukalata opo va dule okukufa ombinga momahoolo oo e li ko neudo.