FlyNamibias tsî TotalEnergies hâra ge !hûǁarehâ ǀhonkhoesis !nâ !Namiǂnûs daob !aroma go ǂgâ
FlyNamibia ǁkhana!oabas ge TotalEnergies ǀkha hâ ǀasa !âǀhuru-aosis !nâ-ū, !Namiǂnûs tsî ǀAeǁgams hâra ǁaegu tsēkorobe ra hâ ǁkhana!oabadi di !gôaga ra ūkhâi ǂgao.
Nē ǀkharaǀkharasib a ǂhâǂhâsaba !aromas ge nē !oabas di taniǀgarahesa īǁkhā kaisa. !Namiǂnûs tsî ǀAeǁgams hâra ǁaegu ra tsēkorobe ǁkhana !oabas ge ǂoa ge kurib 1 ǂKhoesaob dis ai ge sîsentsoatsoa-ūhe tsî nēsis kōse 5 000 khoena !oaba hâ.
“Sida ge nē ǀasa !gâi!gâba sī!nâs, sîsenǁareb hîa TotalEnergies ǀkha hâb dis xa ra !gâiaǂgao tsî TotalEnergie ǂnûiǂgāsa ǁnāti īǁkhāsib !khawagas -huriǂoas ǁga ǁkhana ǁkhās disa ǀhui-ams !aroma kai gangansa ra mā.
ǀNî ǀkharaǀkharasi-i hîa go ǂgâxa-i ge, ǁkhana!oabas di ǂganǀgaugu ǁgas tsîna kō tsî da ge 18 !Hoaǂkhaib 2024 disa xu ǂhâbasa i apa sī!nâhesa ǂganǀgaugu ǁga unu tsî ǁkhanaaon !gôaba ǂhākhâisa.
Nē !oabas sîsenū-aon di ǂhâsigu ge ǁkhāihe,” tis ge ǂhaitsimāǂuis FlyNamibias disa gere khomaisen.
ǀAsa beros tsîn ge ǁkhāti !Namiǂnûs Huri-ammi tawa (Old Power Station) ge ǀhuiamhe.
ǂÂibasens nē beros ǁkhowaamhes dis ge in sîsenū-aon tsî !Namiǂnûs ǀhûhâsib tsîna ǁîn ǂhâsigu ai ra oe-am !oabade māhe ǁkhā.
“Sida !gaeǁares TotalEnergies ǀkha da go tsoatsoas ge īǁkhāsiba ra mā, ǁaekorobe da ǂhâsib ra hâ khami ǀkharaǀkharasina nî ǂgâxa-ūsa, ǂâuǀoasasib !nâ hâ !oabade ǁkhanaaona ǁawoǁawobas ase,” tib ge FlyNamibias di Dana Sîsenǂuira Mâisab, Andre Compiona ge mî.
“Nē ǂhanusi ǁkhowa-ams ǀAeǁgams tsî !Namiǂnûs ǁkhanadaob dis !nâ !âs ge tita !gâin ǀguina !goaxa ǁaeb !aroma ra mûǂui kai tsî ta ge ǀgaisa ǂgom!gâba ūhâ nē sîsenǁareba da nî taniǀgaras diba,” tib ge TotalEnergies di !hūǂnûǁkhaebas di aiǂnû-aob, Laurent Rocheba ge mî.
FlyNamibias ge !kharaga ǁkhana!oabade ra mā, ǂgaiǀons ai, Eros anikuniǂgās ǀAeǁgams !nâ ǁgoesa xu Ondangwas, Katima Mulilos, !Namiǂnûs tsî !Garibams.
ǀKharisi ǁkhanades ge Hosea
Kutako !Auga!hūsi Anikuniǂgās tsî ǁHuiǂgaeb !Auga!hūsi Anikuniǂgās hâra ǁaegu ra dī.
ǁKhātis ge !Gomenǁgams anikuniǂgās tsî ǁHuiǂgaeb !Auga!hūsi Anikuniǂgās hâra ǁaegus tsîna ra !oaba, Airlink ǁkhana!oabas ǀkha hâ sîsenǁareb !nâ-ū.
Nauhâ ǀkharisi ǁkhanadi ge Hosea Kutako !Auga!hūsi Anikuniǂgāsa xu !oa!ū Victoria Falls, Zimbabweb tsîna Mauns hāaro rase arohe hâse. Botswanab ǁga nî hâ ǁkhanas ge nē kurib di ǂKhoesaob !nâ ǂhanusise nî ǂanǂanhe.
FlyNamibia Safaris ge ǁkhana-aona Hosea Kutako !Auga!hūsi Anikuniǂgāsa xu dana !narisarimas mûhesa-anuxūn hâpa ra sī-ū tsî ǁkhāti Eros Anikuniǂgāsa xu Rundus kōse.