ǂōǂōsib !nâ hâ !napan ge a !norasa
Ministeris ǂNamipeba !ûi!gâs, Haiǀgoms tsî !Narisarimas dis (MEFT) ge ǀhûhâsiba ǁawosasiba ge mā, ǁnāpa-i ǀguis khami i !aroma-e a ǀkhaisa, !napan di mâsib Zambezi ǀkharib !nâb ǂnamipe. ǁNā ǀkharib !nâ di dā!harode a ǁaxa-ūhe mâtib nē mâsiba oresa a hōbahe ǁkhās !aroma xui-ao. Nēs ge ǂoa ge wekheb di Mantaxtsēs ai-i ge a !nurihe ǁnāpan ǁaupexa 100 xa a !nāsa !napana Chobe tsî Linyati !ākha !nâ ǂgoab !nâ !gûǁoase mā tis khao!gâsa. Ministeris
ǂNamipeba !ûi!gâs, Haiǀgoms tsî !Narisarimas di mîgowaba-aob, Romeo Muyundab ge ǂoa ge wekheb di Denstaxtsēs ai ge mî, ǁîn oresa hōs ase ra sîsenū dā!harodi di ǀguis, a ǁawoǂawosa î-i ǂauna ǁgam-e !napan nî ā tsî hâ!nâ ǁkhāse hâǀgara, sao ra ǀapiǁaeb kōse. 2019ǁî kurib !nâs ge ministerisa tsauba kuru tsî generators pompi tsîna ǁgam-e ǁnāpa ǀoaǀoas !aroma ge ǁama.
ǁNā ǁaeba xus ge nē generatorsa ǁîs sîsen-e ǁgam-e ǀoaǀoas !âb ai ra dī. Muyundab ge ai!â ge mî, ministeris ge ǂguro ǁkhâgu nē kurib digu ǁaeb !nâ, !aubǀgurun kō!gâ!nans Botswanab dis ǀkha ǁgamǁaredi !nâ hâ isa, i kha nē !hūkha ǀhûǁarebese nē !napan mâsiba kōǀî.
Nēs khao!gâs ge Botswanab ǂgaeǂguisa hāǀaro rase generatorsa
ǀoaǀoa tsî ge mā ǁgam-i nî pom!kharuhese. Nēsis kōse da ge ǀgam generatora ǀkha ǁgam-e poms !aroma ǂnôa. Muyundab ra mîsa !oas ge tsaub di ǁgam-i ǁgoeǀgauba !gâi !harib ai mâ, nē ǀgam generatora di sîsenni ase.
Noxopa ǁgam-i mâsiba ge !gâi!gâi!nâs ge, nēsi i tsēaǁaegu ai sores ǀgammi ǀkha ra sîsen ǀgaib ǀkha ǁgam-e ra pomhe tsî !uiǁaegu ai ǀgui generatora ra !amhesa.
“Nē ǀaweǁguib ǀkha da ra ǂâibasens ge !napana ǂâuna ǁgam-e hoaǁae ūhâbasa in sao ra ǀnanuǁaeb kōse ûisīsa tsî ǁnā-amaga tsauba ams kōse ǀoaǀoas ai hâ tama hâsa.
ǂKhawusa ǀnanub ge !aroma !khais ge tsaub tsî !āgu !nâ i ǁgam-e ǂhâbasa ǀnōb ai sī tama ge īsa,” tib ge Muyundaba ge mî.
“Xawe sida di ǁgui-ais ge ministeris ase da !napan di ûi!kharusa nî ǁawoǁawosa. Sida ge nî ai!gû, nē mâsiba kōri tsî ǂhâbasa dā!harode ūsa mâsib nî mā-am khami,” tib ge ge ǀamǀam. ǂÂiǂhAnsen-i A ǀkhAi ... Dā!hArodi ge ge ūhe tsî A sîsenxA, ZAmBezi ǀkhAriB !nâ hâ !nApAnA nē mâsiBA xu huiǂuis