Muni gwaShakati a uvaneke omayakulo gokupomba onyata mEvululuko oshali
■
Aakalimo yomoshitopolwa shEvululuko mOshakati otaya ka longitha omayakulo gamuni gondoolopa yawo gwokupomba onyata oshali uule womvula yimwe konima etungo loopiyapi ndhoka hadhi pomba onyata dha pu kutulwa mo.
Omupeviminista gwomahumokomeho gwomeendolopa nokomikunda Evelyn Nawases-Taeyele okwa uvaneke aakwashigwana poshituthi shepatululo dhoopoloyeka dhokutunga ondjila tayi kwatakanitha ondjila yOkahao nondjila onene yaShakati noshowo okutula oopayipi dhonyata molukanda Evululuko.
“Ötandi pandula muni gwaShakati molwetokolo ndika ewanawa notandi indile aakalimo yomEvululuko ya tambule ko ekwatho ndika lyoshali,” a ti ngaaka.
Okwa ti oopoloyeka ndhika otadhi holola nkene oshilongo tashi humitha komeho oondoolopa, okukwatela mo aantu ayehe shoka shi li omalalakano gepangelo.
!Nawases-Taeyele okwa gwedha ko kutya eepoloyeka ndhino otadhi hwahwameke ompangela yoministeli okukokeka omahupilo, egandjo lyiilonga, nokukaleka po omidhingoloko.
“Etungo lopoloyeka ndjika otali ka humutha komeho nokukwatakanitha, ashike otayi ka hwepopaleka onkalo yaantu yomOshakati,” ta ti.
Evululuko olyo limwe lyomomalukanda omugoyi gakala kaage li pambelwa mOshakati, moka aantu ya kala ethimbo nuule taya zi monkalo yaali puundjolowele, nomakwatho ga ngambekwa ngaashi omeya, olusheno, oopayipi dhonyata nosho woo oopate.
Mayola gondoolopa yaShakati Leonard Hango okwa ti, otaya longo nuudhiginini okuninga omalukanda omalukalwa gopamuthika omwaanawa omayalululo gwomumvu kehe.
“Ohatu tula po oshimaliwa oshindji mokuyambula po omalukanda, ngashingeyi otwa pondola okuyambula omalukanda gahetatu ndakwatelamo Evululuko,” a ti.
Medusalem Komeya, omutse golukanda okwa ti nonando aantu oyendji molukanda oya kala nuundjugo iha wupombo mboka yena uundjugo hawu pomboa oya kandulilwa po omukundu omunene gopashimaliwa sho muni taka tulamo opayipi ndyoka yonyata oshoka ita ya ka kuta wee aantu yapombe mo onyata.
“Otwa pendula unene kumuni molwa eyakulo ndika lyoshali uule womvula, uundjugo mboka owa kala nokutu molosa oshoka ohatu pombo mo onyata kehe konima yoomwedhi ndatu,” a ti.
Omukuluntu gwoWindoek Consulting Engineers mOngwediva Timoteus Negonga okwa ti, opoloyeka otayi kapwa okutungwa muNovomba nuumvo noopelesenda omilongo ndatu dhopoloyeka odh apwa nale.
Okwa ti oye na po uupyakadhi womeya gokohi yevi ogendji molwomulokwa gonuumvo.
“Üupyakadhi wulwe otawu ke ya ngele aantu mboka ye li mondjila moka opayipi tayi ka enda inaya hala okuza po,” a fatulula ngaaka.
Aakwashigwana oya li wo pepatululo lopoloyeka yokutunga opate tayi kwatakanitha ondjila Okahao MR111 nondjila onene MR92 yaShakati.
Ondjila ndjoka otayi kakwatakanitha omatala gaShakati tayi gandja ompito yomeendelelo okuya koositola Metro naCashbuild nokushunitha pevi omusholondondo gwoohauto mopate yoM120 okuya koGame nopate yokuya kOkatana.
Osha kala onkugo yaakwashigwana, unene tuu mboka haya landitha noshowo aahingi yoombesa opo muni a tunge ondjila ndjoka.
Opoloyeka yokutunga oopayipi dhonyata otayi ka kotha muni oomiliona ne oshinkwanu omugoyi omanga opoloyeka yopate tayi kotha oomiliona heyali oshinkwanu ne.