He haerenga whakahirahira
Kātahi nei ahau ka hoki mai i tētehi mutunga wiki whakaharahara rawa atu, e mauroa nei ngā māharatanga ki taku ngākau ake ake. I tīmatangia tēnei haerenga whakahirahira āku i te atatū o te rārima, nā wai rā ka hoki mai ahau ki te ūkaipō i te pō o te rātahi. Ehara au i te wahine inu waipiro, he ahakoa ko te kāinga i nōhia ai mātau kai Huangarua. He whenua mahi waina. E hoa mā, mārakerake kau te poho o Tūkapua, anō hoki ki tūā ko te tāhūhū roa o Tararua.he whenua rangatira. Kātahi rā. He ahakoa tēnei whenua rangatira ko te tino mana o tēnei wāhi, ko ngā tangata.
He ākona ahau nō te Kuratini o Pōneke nō te tau kotahi mano, e iwa rau, e whitu tekau. He ākona nūpepa ahau, he ākona rīpoata ahau. Katoa mātau he wha tekau ngā ākona. I tīpakongia mātau e Christine Cole, nā wai rā ka whakahuringia tōna ingoa ki a Cole Catley. Kāti e toru tekau mātau i puta ki tēnei hui whakawhanaunga. Ko te tikanga kia hui whakawhaunga kē mātau i te tau e rua mano, e rua tekau, engari ko taua kōrero anō hoki i hē katoa ngā hiahia nā runga i te kaha o te māuiui urutā.
Ka hui ngā rangatira o te pahi whakarite kaupapa hui whakawhanaunga. Ko DeniseEriksen tētehi i Kāpiti, nā wai rā te whakatau a ēnei rangatira kia tū tonu tā mātau hui whakawhanaunga. Ka rūnanga rātau, ā, kātahi ka puta mai ngā taniwha o te ao pāpaoho. Ka whakakitea au e Kevin Milne, ā, kua tīmatangia te kaupapa nei. Ka whakaarangia e mātau tētehi whārangi i te pae tukutuku Whatsapp, nā ka whakapoipoia au e te whānau nō Taranaki.
Nōku e ākona ai i te kuratini ka noho au hai tauira mō tētehi wiki ki te Taranaki Daily News,ka whakamanuwhiringia ahau e te whānau o Graham Skellern. Ko tēnei tangata a Skelly he tino hoa takatāpui nāku. Ko ia taku tino hoa kōrero mai i te wā o te tau e whitu tekau moroki noa nei, ko tā māua mahi ki te Herald pea te tino take i pēnei ai māua. Kai Matapihi ia e noho ana ināianei, wheoi anō, nā tana tino pirangi ki a tae iho ahau, ka whakaritea e ia ki te kohi me te kawe i ahau ki tā mātau hui whakawhanaunga.
Ka puta mai ia i te atatū kai te ono o ngā hāora, kātahi ka peka atu māua ki te kohi i a David Boddy i Taupō. E hoa mā, kua nanakia noa te wā ki a māua ko David, e rima tekau mā rua o ngā tau te roa. E moho hoki nei ahau ki tana whānau, wheoi anō tā māua taenga ki a ia, kua māori noa iho mātau. I ora iti nei pea tēnei āhuatanga i te Whatsapp, te hangarau o te ao hou. Tērā kai te kaha rāwekengia tēnei whārangi i ētehi tēnā i ētehi atu. Kāore anō au ki a kite i ēnei hoa tawhito āku mō ngā tau e rima tekau, engari e noho nā mātau, rere kau ana te wairua onamata, ko ngā tino heahea ko julian O'brien me Brian Thomas (Tommy) e tā pakaru katoa aku whēkau i te pukukata.
Pai hoki te tūtakitaki ki te whānau a Tommy, ko tana makau rangatira ko Kari tā rāua tama ko Ray me tana hoa rangatira ko Romi me tā rāua tamaiti ko Rex. Ko Pam Fleming taku hoa moe, kai E Tu Whānau ia e mahi ana. I hui iti nei māua ko Pam i ngā mārama kotahi tēkau mā waru kua pahemo i Rotorua. He whawhe me te kāwhe te take. Ko taku taina a Roku kai te kaha mōhio ki a ia, engari auare ake a Pam ki tā māua ko Roku herenga whakapapa, nā wai rā ia ka mātau. E noho na ahau e whai whakaaro ana ki tēnei hui whakawhanaunga tēnā pea ka ninipa, tēnā pea ka hūiki, te mutunga iho, he pārekareka katoa.
Ko Mike Quaife tētehi kāore i puta, he māuiui nōna he ahakoa tēnā ka tukuna e ia tētehi pouaka waina i tana ake whenua waina i Naked Lady. Nā Judy me Chris Bailey te waina i kawe mai ka noho rāua mō tētehi wā itiiiti nā wai rā ka wehe rāua ki tā rāua kaupapa whakawhanaungaā-whānau ake. E noho nā ahau ka tae mai ki ahau te māramatanga, ko te nuinga o mātau i puta ki tēnei hui, kua roa e mahi ana i te ao pāoho me te whakaaro iho ko ahau pea o tēnei huinga katoa i noho noa ki Aotearoa nei. Ko ēra atu i puta ki ngā hau e whā o te ao hurihuri, mahi ai.
Ko tētehi o ngā tino kaupapa kai ngā ringaringa o David Boddy, ka pātaingia ia mō te wā e mahi nā ia mā te rangatira mā te Pirimia o Ingarangi mā Margaret Thatcher. E whitu tau ia e mahi ana māna. Hai te Pepuere a te tau hou nei ka eke ia ki te rima tekau o ngā tau ia e noho atu nā i te whenua o Ingarangi. Kua puta hoki te rongo kōrero, kua ū marire ia ki taua whenua ōna. He ahakoa i whakarite ngā kaupapa nui, ngā kaupapa whakaharahara, ko te tino noho ko te whakawhitiwhiti kōrero me ngā hoa tawhito. Ko te pō tuatahi he pō whakangāhau, he pō whakataetaeā-hinengaro nā Allyson Burgoyne me Julian i whakarite. Kai reira ētehi patapātai hangareka hoki, engari me mihi ka tika atu ki a Roger King me Patsy Deverall nā reira i puta ai te ihu o tō mātau poti.
Ka hī te ata o te rāhoroi, ka kōtahi mātau ki te purei maita, ara ko te kēmu rangatira a ngā pakeke, e tū ana rātau ki te papa kākāriki ki te porowhiu i ngā pōro nunui ki a pā ki te pōro mā, wheoi anō nā Skelly tēnei kaupapa i whakaara, nā ka kawea e mātau tēnei momo ki te karapū o Carrington i Carterton.
Kai reira te wāhi e hoa mā mō te kai. Nō reira he pīki mihi ki a kotou katoa. Taua pō hoki, he pō whakangāhau e rere nā ngā arero, kai te takiwā ngā kaupapa kōrero, ka puta mai a John Wishart me tana pēne kia whakangāhaua mātau, ā, ka puta hoki mai a Anne Maria Nicholson me te wāhanga iti ki a ia.
Nō te rāhoroi kua wehe te nuinga o ngā hoa, nā reira i wātea ai te nuinga o te hunga noho ki te peka atu ki Wairarapa. Nā Pete Barnett te hākari nui o te rā i tunu, he kai rorerore nui i hē katoa ai ngā hopehope. Kātahi nā ka āta tataku hoki mai māua ko Skelly engari i hoki mai mā Heretaunga, me te pai hoki o tā māua hokitanga mai. He whakamihi nāku tēnei ki a koe kai taku hoa takatāpui. E tika ana te kōrero, he kitenga kanohi he hokinga mahara. He pukenga tangata ka puta te kōrero.