Kai te parehua tē pā o Oruareimokoroa
Oruareimokoroa. Kai te uru tētehi pā whakairo e tū ana, kai raro ngā taketake o Tānemahuta ināianei e noho puku ana.
He ahakoa kua ngaro ngā tumu, me ngā tūwatawata me ngā tangata kai te kōrerongia tonungia a Oruareimokoroa.
Kai te parehua tēnei pā. E rua hoki ngā awa kai tōna pūtake. Ko Ngongotahā kai tētehi taha, ko Otamaroa kai tētehi taha. E hoa mā kia kitea rawatia te pā nei, kātahi te tangata ka marama ki tēnei kupu ko te wehi.
Me rangatira ki te whakatakoto rautaki e taea ai tēnei pā nui onamata. Me he moho kē te tangata e tika ana ia ki te umu. Ko Ngāti Haumia tētehi o ngā hapū ki tēnei whenua.
E hoa mā kāore au e huna i te kōrero, tē aro i ahau ki tēnei hapū.
Wheoi anō e rua anō hapū ki kōnei, ko Ngāti Tuara me Ngāti Kearoa.
Ko Weka te rangatira o Ngāti Haumia tērā tētehi kōrero e mea nā kai tētehi rangi ka kāwhakina e ia a Kuiangoingoi te wahine o Te Rangiiwaho, koia tēnei he mokopuna nā Pukaki. Ka tonoa e Te Rangiiwaho āna kiritata a Ngāti Tunohopu, ka puta mai rātau ki a ia.
Ka takoto te matua, ka iti ki mua ka roa ki muri ka hoki a Te Rangiiwaho me tana rangatira a Kuinoingoi ki tō rātau pā.
Me i patu a Weka e Te Rangiiwaho kāore i kōrerongia. Wheoi anō ko tētehi kōrero anake tēnei. Ko te tino kōrero kai te wā e ora nei a Whitiora.
Ko Ngāti Raukawa te iwi nui ki tua o te hauāuru o Oruareimokoroa. Kua tūtaki kē tātau ki tēnei rangatira.
Ki a Whaita me tana whaiaipō ki a Waiarohi me te māunga nui ko Hapārangi. Kai tēnei tātai kōrero hou ko Pipito te rangatira o Ngāti Raukawa, kua puta mai rātau ko tana iwi ki Oruareimokoroa. Ka kitea rātau e te iwi.
Ko ngā toa kai wāhi kē atu. Ka oma a Whitiora ki Ngā Waru Pūmanawa o Te Arawa he kawe i te rongo tauā ki ngā iwi he whakaemi toa te take.
E ngaro ana ngā toa, kua mau taiaha ngā wāhine. E mea ana ka puta tētehi ki te matataki-ā-whiro ki te tauā kai tangata. E wāuna hoki kua horomia te ingoa o tēnei ruruhi ki ngā wai uriuri.
Kāti, kai te ātea e hītekiteki ana, e tikapokapo ana, ka tu te ope ka huaki te riri.
E tika ana, ko ngā wāhine me ngā tamariki anake ki te pā whakairo. Ka hinga te nuinga, ka ora te iti.
Ka puta a Whitiora ki ngā waiariki, e pāorooro kau ana te pahu e karanga nā ki ngā toa o te takiwā.
Ka puta ngā matākaikutu, ka hoea ngā wai karekare, ka takahia te ara, ka noho ki Ngongotahā.
E rūnanga ana ngā rangatira. Ka hī te atatū kai te huarahi rātau e haere ana.
Ka huaki te riri, e āuē ana ngā amokura, e hāmama ana ngā waha, kai te hinga ngā rangatira, he rangatira anake i mate.
Kai runga a Ngāti Raukawa kai te pūtake a Ngai Te Arawa, ka whatiwhati haere ētehi, ka oma ngā morehu.
E oma ana ngā rangatira ka whāia a Whitiora e Pipito, ka tūturi a Whitiora e huri ana me te auporo i tana mere pounamu ki te tāhau waewae o Pipito, ka whati tana waewae, kai te whenua e oreore ana, ka rūpeke a Whitiora kai te tarouma o Pipito e hahau ana tana ika. Ka mate a Pipito.
Nā reira i hēmanawa ngā toa o Ngāti Raukawa. Kai te rangi a Te Arawa e ngūnguru ana, e hiko kau ana te rangi, ka whati te hoariri. Ka ora a Ngai Te Arawa. Engari anō e hoa mā.
e i ora a Ngai Te Arawa engari kia tika rā, i ora anō tātau i ngā wāhine mīreirei o Marutewhareaitu.
Nō reira e kui mā, tēnā kotou.