Harald Olsen
Vår kjære ven og songarbror Harald Olsen (født 1945) døydde første pinsedag, 75 år gammal. Denne energiske og sterke mannen måtte gi tapt etter lengre tids sjukdom.
Vi fekk lære å kjenne og elske denne mannen gjennom 40 års samliv i songgruppa Freedom Quartet. 40 år med konsertturnear og øvingshelger skapte eit intenst, levande fellesskap. Det var Harald som introduserte sjangeren spirituals for oss. Freedom Quartet vaks etter kvart til sin manndoms fulle kraft. Bokstaveleg tala i botn låg Harald si djupe og sikre bassrøyst.
Freedom Quartet var meir enn ei songgruppe. Kvartetten vart etablert i ei tid då studentopprøret sette sitt preg på studentmiljøet. Som fleire av oss hadde Harald sin bakgrunn i Bedehuset. På typisk Haraldvis vart han så ei tydeleg røyst i den kristensosialistiske rørsla, formulert skriftleg i artiklar og bøker.
Men Freedom Quartet var også meir enn ein syngande og diskuterande guteklubb. Etter kvart vart vi også eit fellesskap av familiar med ektefellar og barn der familiekjære Harald var ei søyle og eit sentrum.
Haralds livsveg og livsval var prega av produktiv kraft, vilje og stor omstillingsevne. Han var utdanna realist, men valde ein yrkeskarriere innanfor kulturliv og kulturfag. Prosjekta hans var tallause som havsens sand og fleire munna ut i bøker, radio- og Tv-program og Cd-produksjonar.
Han gav ut mange bøker som har inspirert søkande menneske. Stor var gleda hans over å kunne fullføre den siste boka Hellig sted. Der inviterer pilegrimen Harald oss til å bli med til stader som har betydd mykje for han, og som kan utfordre og utdjupe vår tru.
No har Harald nådd målet sitt. Han er heime. Vi i «Freedom-familien» er djupt takksame for følgje. Vår djupaste medkjensle går til Reidun og familien som Harald elska å leve i og for.