ILLUDIT go besset fas čoahkkanit

Dál lea viimmat fas doaibma Máze ássan- ja doaibmaguovddážis ja vuorasolbmuin lea báiki gos besset deaivvadit. Muhto, eai sii soaitte guhká gal beassat dohko čoahkkanit.

Máze ássan- ja doaibmaguovddáš lea máŋga jagi juo leamašan giddejuvvon ja visti lea čužžon ávdimin. Muhto, dál gullo fas sihke šurran ja sálbmalávlun guovddážis ja gáfehádja deavdá feaskáriid. Soaittáhagas

Lea soaittáhagas ahte guovddáš dál lea fas rahppon, ja Máze vuorasolbmuin lea báiki gos besset deaivvadit ja ovttastallat. Guovdageainnu searvegotti diakonas Elle Kari A. Saras lea rievtti mielde kantuvra Guovdageainnu márkanbáikkis. Son muitala ahte heajos sisáimmu geažil šadde dan kantuvrra giddet ja son lei de kántursaji haga. Guovdageainnus ii leat nu álki gávdnat kántursaji sutnje, ja nu fuomášii ge searvegoddi láigohit kantuvrra sutnje Máze ássan- ja doaibmaguovddážis.

Nu bođii maid jurdda ásahit

deaivvadanbáikki vuorasolbmuide Mázes, vai sis maid lea báiki gos besset čoahkkanit ja deaivvadit eará vuorasolbmuiguin.

Eai leat fálaldagat

Mázes eai leat makkárge fálaldagat vuorasolbmuide. Dál, go guovddáš fas lea rabas, de besset fas deaivvadit, humadit, sálmmaid lávlut ja vel duddjostallat ge, geat dan háliidit.

Eaktodáhtolaš goahkat

Guovddáš lea dál rabas guokte beaivvi vahkkus, mánnodagaid ja bearjadagaid. Guovddážis guossohit maid gáfe ja mállásiid vuorasolbmuide. Elle Kari Anti Sara muitala ahte sii leat deaivvademiide ožžon veahki giliolbmuin. Dan beaivvi go Ávvir finadii guossis lei Kirsten Anne Bongo Eira boahtán eaktodáhtolaš veahkkin ja vuoššai mállásiid vuorasolbmuide.

Váillahan deaivvadanbáikki

Mánnodaga, go Ávvir finadii guossis, ledje guovddážii čoahkkanan 15 vuorasolbmo, ja sii lii- kojedje deaivvadit. Sii lohket ahte leat hui ilus go sis dál lea fas báiki gos deaivvadit, go sii leat ge guhká váillahan deaivvadanbáikki gosa besset čoahkkanit ja šurrat ilmmiid álmmiid.

Muhto, dađi bahábut ii leat sihkar ahte dát ilut bistet nu guhká, go searvegottis lea láigošiehtadus dušše dassá go geasseluopmu álgá. Jus láigošiehtadus ii guhkiduvvo, de ii soaitte gal sis čakčat šat deaivvadeapmi.

VUORASOLBMUID DEAIVVADEAMIS: Mikkel Johansen Kemi, Aslak Anders A. Eira, Elen P. Buljo Eira, Nils Mathis M Kemi Utsi ja Kirsten Anne B. Eira

LÁGIDEADDJI: Guovdageainnu searvegotti diakona Elle Kari Anti Sara.

DEAIVVADEAMIS: Ellen Marie Gaup.

Govven buot govaid: Anders Nils J. Eira M. Eira, Ellen Anne Haetta, Elle Kari A. Sara, Kirsten J. Eira, Inger Anne S. Gaup, Inga S. Gaup, Anne Marie G. Eira, Inga

GOAHKKA: Kirsten Anne Bongo Eira lei veahkkin deaivvadeamis ja vuoššai mállásiid vuorasolbmuide.

SÁLMMAID LÁVLOT: Ellen Anne Haetta, Anna Anti ja Marit Gaup Sara.

SÁLBMALÁVLUNBODDU: Nils Mathis M. Eira, Ellen Marie Gaup, Mikkel Johansen Kemi, Mikkel P. Sara ja Elen P. Buljo Eira.

HUMADIT: Ellen Anne Haetta, Anna Anti ja Inga Kemi Utsi.