Lávostallamiin ovdánii matematihkka
Oahppodirektoráhtta rámida Guovdageainnu vuođđoskuvllaid go leat nagodan jorgalahttit oahpahusvuogádaga. Dál oahpahit sii sámi kultuvrrain earret eará matematihka, fága mainna skuvla lea ovdánan ollu.
Oahppodirektoráhta nu gohčoduvvon bagadeaddjit oaivvildit áhte Guovdageainnu vuođđoskuvllat leat minsttarskuvllat go lea sáhka ovdáneamis, oahpahusdagus ja systemáhtalaš barggus. Sii leat maid nagodan jorgalit treandda ja sis leat buorit árvosánit earret eará matematihkas dán jagi.
Bagadeddjiin stuora ávki
Oahppodirektoráhta bagadeaddjit barget dan ala ahte nannejit skuvllaid kvalitehtaovddidanbarggu ja direktoráhta bagadeddjiin leat leamašan barggut mat gusket Guovdageainnu mánáid- ja nuoraidskuvlii 2016 rájes. Ruovttuluottadiehtu suohkaniin, main leat leamašan bagadeaddjit veahkkin, leat lohkan ahte lea ávki leamašan das. Nu lea Guovdageainnu vuođđoskuvllaide maid leamašan.
Earenoamáš oahpahus
Bagadeddjiid jođiheaddji, gii lea bargan Guovdageainnu suohkaniin, Inger Lise Bratteteig, lohká eanemus mii sin hirpmahuhtii lea movt skuvla geavaha sámi kultuvrra ja árvvuid oahpahusas. Nu go luonddu ja sámi árbevieruid heivehit oahpahussii.
– Lea earenoamáš vuohki oahpahit, ja mii addá ohppiide buori vuođu.
Buorre ovdáneapmi
Nuoraidskuvlla našuvnnalaš geahččaleami bohtosat mannan čavčča čájehedje ahte lea buorre ovdáneapmi skuvlla ohppiin.
– Skuvllas lea hirbmat buorre ovdáneapmi, ja barget maid dainna ahte galget ovdánit. Sis lea buorre jođihangoddi ja leat ásahan buori joavkku. Sis lea maid buorre systemáhtalaš vuohki movt barget, ovdamearkka dihte movt mobbema vuostá galgá bargat, ja maid makkár gulahallan galgá leat ohppiid ja oahpaheddjiid gaskka, ja ohppiid gaskka.
Oahpaheddjiin stuora gelbbolašvuohta
Bratteteig lohká ahte skuvla lea hui čeahppi čuovvolit oahppobohtosiid ja barget hui mearrediđolaččat ja leat bienalaš plánat maid čuvvot.
– Oahpaheddjiid gelbbolašvuohta ovdána ja sis lea maiddái juo stuora gelbbolašvuohta, fágagelbbolašvuohta.
Buorit bohtosat
Guovdageainnu sátnejođiheaddji, Johan Vasara, lohká hui somán go boahtá ovdan ahte vuođđoskuvla lea ožžon dakkár buriid bohtosiid.
Ánssášan dakkár bohtosiid
Vasara lohká diehtit ahte skuvla lea hui vuđolaččat bargan dainna prošeavttain, sihke oahpaheaddjit ja luohttámušolbmot ja skuvlla jođiheaddjit.
– Dat gal leat duođai ánssášan dakkár buriid bohtosiid go mun dieđán man bures dat leat bargan daiguin.
Movttiidahtti politihkkariidda
Earenoamážit matematihkas oač- čui vuođđoskuvla buriid bohtosiid, ja de lohká ge sátnejođiheaddji ahte loaktin skuvllas orru buorráneame Guovdageainnu vuođđoskuvllas.
– Dat lea hui movttiidahtti sihke midjiide politihkkariidda ja olles suohkanii go čájehuvvo ahte vuođđoskuvla bargá buori barggu.
Váldit vára buriid ođđasiin
Sátnejođiheaddji lohká dehálažžan váldit vára dakkár buriid ođđasiin, ja dat movttiidahttá vel eambbo bargat dakkáriiguin go na buorit bohtosat leat.