Sirpmá skuvlla seailluhit
Deanu gielddastivra mearridii joatkit Sirpmá skuvlla doaimma čavčča rájes, dan dihte go leat ožžon mielruhtadeami ja skuvla doaibmá rádjeprošeavtta várás.
Sirpmá skuvla Deanus lea leamaš garra biekkaid siste, go diimmáš ja 2015 gielddastivrra bušeahttačoahkkimis mearridii gielddastivra heaittihit Sirpmá skuvlla doaimma. Diimmá geassemánu gielddastivračoahkkimis mieđai gielddastivra addit vejolašvuođa joatkit doaimma Sirpmá skuvllas čavčča rájes go ožžo lohpádusaid Sámedikkis ahte ožžot ruhtanávccaid doaimmahit oktasaš proše- avtta «Ovttas». Duorastaga gielddastivračoahkkimis de mearridedje gielddastivrra politihkkárat ahte Sirpmá skuvlla doaibma galgá joatkašuvvat dan geažil go skuvllas ja Oahcejoga skuvllas lea erenomáš prošeakta, namalassii «Ovttas».
Rádjeskuvlaprošeakta
Deanu gieldda sátnejođiheaddji Frank Ingilae lohká Sirpmá skuvla lea ain mearriduvvon heaittihuvvot, muhto galget joatkit doaimma rádjeskuvlla prošeavtta várás.
– Gielddastivra lea mearridan ahte mii joatkit prošeavttain. Mii gohčodit dan prošeaktan, go leat hui unnán oahppit mat leat dan skuvllas. Mii diehtit ahte Norgga ja Suoma sámedikkit galget guorahallat vejolašvuođa ahte dát prošeakta lea stáhtaid hálddus, ja gos oažžu olgguldas ruhtadeami rádjeskuvlla prošektii, dadjá Deanu sátnejođiheaddji.
Ruhtadeapmi
Deanu gielda lea ožžon Sámedikkis 400 000 ruvnnu mielruhtadeami prošeavtta «Ovttas» várás. Deanu ráđđealmmái lea dál ožžon dieđu sihkkarastit ja háhkat oahpaheddjiid čakčii viđa oahppi várás.
Sávvá bissovaš olgguldas ruhtadeami
Deanu gielda ii vuordde ahte ohppiidlohku lassána lagamuš áiggis, muhto prošeavtta oktavuođas lassána ohppiidlohku moddii vah- kus Sirpmá skuvllas.
– Lea šállošahtti go lea nu olu eahpesihkarvuohta skuvlla ektui ja dat lea čadnon ohppiidloguide. Dát oktasašprošeakta, mii lea čađahuvvon nu máŋggaid jagiid, lea hui erenomáš. Guokte beaivvi vahkus leat hui olu oahppit ovttas skuvllas, go Suoma bealde leat olu oahppit geain lea sámegiella eatnigiellan. Dat mii lea mielde sihkkarastimis ahte dát šaddá bissovaš prošeaktan, lea jus oažžu bissovaš olgguldas ruhtadeami dahje olgguldas mielruhtadeami, dadjá sátnejođiheaddji Ingilae.
Gielddastivra ovttaoaivilis
Deanu sátnejođiheaddji lohká Deanu gielddastivrras lea dáhttu bisuhit giliskuvllaid gielddas, go sii geavahit olu áiggi ja resurssaid vaikke eai leat olu oahppit skuvllain.
– Mis lea dáhttu bisuhit giliskuvllaid, muhto gávdno maiddái rádjá man guhká mii sáhttit doalahit. Gielddastivra lea ovttaoaivilis bellodagaid gaskka ahte Sirpmá skuvla lea erenomáš skuvla prošeavtta geažil, ja go Sámediggi lea mielde ruhtadeames skuvlaprošeavtta, de skuvlla doaibma joatkašuvvá ja ferten giitit sámediggepresideantta Vibeke Larsena dan ovddas, cealká sátnejođiheaddji Frank Ingilae.