Luossalohkan Kárášjogas 2017
Deanučázádaga Guolástanhálddáhus dieđiha ahte geassemánu 11. beaivvi bidje luossalohkanrusttega Beskenjárgga šalddi bokte. Vuosttaš geardde lohke luosaid dákko bokte 2012 geasi. Ulbmil dáinna prošeavttain lea čuovvut mielde mo Deanoluossa birge. Dán geasi, jagi 2017, čuovvolit ovddit jagiid doaimmaid, nu go čoaggit šálašdieđuid, čuopmaiskosčoaggima, videoin vákšut luossagorgŋema Lákšjogas ja Ohcejogas, geahččat man olu luossa gorgŋe golmma Suoma beale smávit oalgejohkii ja registreret veajehiid ja velá sonáriin lohkat luosa Beskenjárgga bokte.
Ráfáidahtton guovlu
Ulbmil dán jagáš lohkamiin lea ahte galgá sáhttit einnostit buorebut gođđama Kárášjogas ja iskat mo guokte sonára luossalohkanrusttega (Simsonára ja Aris) iskan dihtii mii lea buoremus vai sáhtášii daid geavahit Deanus 2018:s. Go coahku johka geassemánu loahpas, de sirdet sonára vuolábeallái šalddi. Sonára lea eanemus dárkil go vákšunklássa lea gárži ja mađe lagabut luossa vuodjá, dađe dárkilabbot sáhttá dat mihtidit luosa guhkkodaga. Mađe johtilabbot johka coahku dábálaš dillái, dađe eanet luossa vuodjá meattá sonára go lohkandilli lea buorre.
Deanučázádaga Guolástanhálddáhus (DG) lea mearridan ahte guovlu lea ráfáidahtton 100 mehtera bajábeallái ja vulobeallái lohkanrusttega. DG lea vuhtii váldán olbmuid dovddus fierpmebivdosajiid. DG lea maid bargamin oažžut luossalohkanrusttega Iešjohkii, muhto ii leat vuos gávdnan vuogas saji dasa.
DG ávžžuha olbmuid váldit čuopmaiskosa juohke luosas maid goddá, erenoamážit sii geat bivdet Kárášjoga vuolit oasis. DG vuorbáda 2 500 kruvdnosaš skeaŋkakoartta sin gaskkas geat leat sádden čuopmaiskosa.