Álkes doaimmat sihkkarastet sihkkelastiid
Eambbo sihkkelastit addet eambbo bárttiid, čájeha Stáhta geaidnodoaimmahaga varas iskkus. Muhto Oslos gal ovdána rievttes guvlui.
– Rukses luotta ja govdadit sihkkelluotta dihte lea mihá álkit oaidnit sihke biilavuddjiide ja sihkkelastiide gokko sihkkelastit galgá, lohká NAF gulahallanhoavda Inger Elisabeth Sagedal preassadieđáhusas.
Áŋgiruššan Oslos čájeha ahte eai leat álot dat stuora, divrras doaimmat main lea ávki. Stuoridit sihkkelluottaid mat leat juo ja bidjat rukses asfáltta, dasa lassin vel rukses asfáltta ruossalassii, lasiha sihkarvuođa.
– Orru nu ahte dat lea geavvamin kulturrievdadus dainna áŋgiruššamiin. Čielgasit earuiguin lea álkit čuovvut johtolatnjuolggadusaid, ja dalle unnu maid riidodássi, oaivvilda Sagedal.
Čuovo sihkkelnjuolggadusaid
Buorit sihkkelluottat eai leat dat áidna diŋggat mat unnidit lihkohisvuođaid ja unnit riidduid johtolagas. Lea dehálaš ahte buot johtolatjoavkkut čuvvot johtolatnjuolggadusaid.
– Buot vuoddjit fertejit ovdamearkka dihte bisánit go lea rukses čuovga, ja doalahit vuordingeatnegasvuođa, deattuha Sagedal.
Oahpaheapmi nuorran lea dehálaš
Sihkkelastin ferte unnin juo álggahuvvot. Danne lea NAF 50 jagi doallan oahpaheami skuvlamánáide oahpahan dihte sihkarvuođa sihkkelastimis. Praktihkalaš geahččalemiid ja teorehtalaš bargobihtáid bokte ohppet mánát movt sii galget vánddardit johtolagas sihkkareamos vuogi mielde.
– Mis lea stuora jáhkku go oahpaheapmi álgá nuorran juo. Lea mihá buoret go dat ahte gáibidit dat galgá ásahuvvot sierra vuodjinkoarta sihkkelii, oaivvilda son.
– Galgá leat álki váldit atnui sihkkela, muhto johtolatnjuolggadusaid fertejit áigá máhttit go galget sihkkelastit, vázzit ja dasto maŋŋel vuodjit mohtorsihkkeliin ja biillain, loahpaha Sagedal.