Guohcahádja márkanis GIKSIN
Guohcahádja haksogođii jur studeanttaid njune vuollái. Ávviris lea dál čilgehus dasa.
Dán vahkku álggus haksogođii guohcahádja Hánnoluohkás, Guovdageainnus. Sámi allaskuvlla studeanttat ja bargit, geat leat hui lahka dan báikki gos hádja boahtá, leat juo máŋga beaivvi giksašuvvan hájain. Ávvir lea hupman olbmáin gean ovddasvástádus dát hádja lea ja son doaivu hája vahkkus jávkat.
Boahtán váidagat studeanttain
Sis-finnmárkku studeanttaid ovttastusa direktevra Klemet Erland Haetta muitala Ávvirii ahte moadde váidaga gal leat hája geažil boahtán, mii ii leat su dieđu mielde eará jagiid dáhpáhuvvan.
– Lean ožžon vihtta váidaga sis geat láigohit studeantavisttiid dás. In oainne gal ahte leat dakkár váidagat ovdal boahtán, nu ahte dá lea vuosttaš háve go studeanttat dieđihit guohcahája studeantavisttiid lahka, lohká son.
Son muitala maid ahte Diehtosiiddas lea leamaš olu sáhka dán hája birra daid maŋemus beivviid, ja orru nu ahte bargit maid giksašuvvet dainna hájain.
Sávvamis ii bistte
Haetta mielas lea šállošahtti go dakkár hádja lea ássanviessoguovllus, earenoamážit doppe gos studeanttat láigohit ásodagaid.
– Lea veahá šállošahtti go dakkár hájat, maid muhtumat eai gierdda, leat das lahkosis, livččii gal sávaldat ahte ii livčče dát hádja. Sávvamis dat ii bistte šat nu guhká, sávvá Haetta.
Galmmihanrusttet billahuvvan
Čilgehus dán hádjii mii lea leavvan boahtá das go galmmihanrusttet, gos Nils Mikkel Helmen vurkkoda guliid ja iešguđetlágan biergguid, lea njulgestaga billahuvvan. Liegga dálkkiid geažil leat dát suddagoahtán ovdal go son beasai daid čorget eret ja nu álggii ge haksot go suvro. Helmen muitala ahte son láve vuovdit guliid ja biergguid, vaikko ii leat nu olu šat maŋemus áiggi dan dahkan.
– Mus billahuvai galmmihanrusttet dálvet. Dalle geahččalin gurret dan vuorkká, muhto ledje nu jikŋon ahte in ožžon buot olggos. Gal doppe lei nu olu, birrasii 11 tonna. Jurdda lei vuordit dassážii go suddagohte vai šaddá álkit oažžut daid olggos, muhto dat ollejedje suvrut ovdal go ožžon buot eret, čilge son.
Olu váttisvuođat leamaš
Helmen muitala ahte sus ledje váttisvuođat oažžut veahki gurret galmmihanrusttega ja maiddái gávnnahit gosa daid galgá doalvut.
– Skadegruppen finai dáppe geahččame ja jerre dáhkádusfitnodagas sáhttet go sii gurret dan mu ovddas, go dat han šattai dáhkádusáššin. Dáhkádus ii áigon gurret dan ja leat oba heajos resurssat go ii leat gosa daid doalvu. Dáppe eai váldde dakkáriid vuostá ja Álttás lea ges reastaluvvan dat báiki gosa livččii sáhttán doalvut. Dat lea leamaš hirbmat váttisvuohtan munnje, lohká Nils Mikkel.
Dolvojuvvojit dál eret
Son muitala ahte son lea ožžon dál veahá dáhkádusruđa ja beassá ge dál doalvut eret suvron guliid ja biergguid.
– Viimmat lea dal boahtán dan mađe ortnegii ahte beasan gurret dan ja bassat eret dan hájas. Lean viimmat ožžon dal kontainera deike ja dat dolvojuvvojit Ivgubahtii. Dohko lea oalle mátki, nu ahte dat gal gártá divrrasin, muitala Helmen.
Váillaha veahki
Son muitala ahte son lea leamaš oktavuođas suohkaniin, muhto ii loga das boahtán nu olu ávkki go ii meinnestuvvan sin čoavddus.
– Lean šaddan riŋget ja riŋget, in ge oaččo veahki. Ledjen nu vuollánan, ja lei measta juo nu ahte šattan meahccái doalvut. Lean suohkaniin leamaš maid oktavuođas ja mii geahččaleimmet gávnnahit čovdosa dasa, muhto dat ii meinnestuvvan.
Go ferte, de ferte
Son muitala ahte dál juo oaidná ahte šaddá máksit eanet go dan supmi man lea ožžon dáhkádusfitnodagas.
– Olggosgollu gal lea mannan badjel dan supmi man lean ožžon dáhkádusfitnodagas. Lea olu olggosgollu, muhto mun ferten goit birget. Go ferte, de ferte, lohká Nils Mikkel.
Váivi leamaš
Son muitala ahte dát lea leamaš váivin sutnje go olbmot leat giksašuvvan hájain. Sutnje lea leamaš unohas go buohkat hupmet nu olu dan birra, eai ge jeara baicce sus mii lea sivvan hádjii. Dan sadjái sii riŋgejit nu go ovdamearkka dihte suohkanii ja eará báikkiide váidalit dan. Son lohpida goitge hája jávkat vahkku geahčen.
– Dat gal ii leat dieđusge somá leamaš, muhto dál goit galgá ordnašuvvat dat. Vahkku geahčen gal dáidá hádja jávkan, sávvamis, loahpaha Helmen.