Ivan dovdá lihccojuvvon joavkkus
Duolva Duottar bieđganan
Ivan Andre Skum (gasku govas) dovdá iežas bálkestuvvon eret Duolva Duoddara rap-joavkkus. Buvttadeaddji beahttala lihccon geange.
Ovttasbargováttisvuođat čuoččuhuvvojit leat sivvan go Duolva Duottar lea bidjan eret ovtta njunnoša, buvttadeaddji beahttala lihccon geange.
Duolva Duoddaris leamašan golbma njunušgándda lávddis, muhto dál lea joavku bieđganan ja guovttis leaba báhcán jovkui.
– Ii leat ovttasbargu doaibman nu mo galgá. Eambbo in hálit kommenteret, lohká Duolva Duottar produseanta ja ráppár Fred-rené Øvergård Buljo.
Lihccojuvvon
Ivan Andre Johansen Skum ii loga su duohken leamašan heaitit joavkkus.
– Lei joavkku mearrádus ahte galgen heaitit, lihccut mu. Soabadeapmi leamašan guhkit áigge váttisvuohtan siskkáldasat. Jus okta joavku galgá doaibmat de galgá maid gulahallan leamen buohkaid gaskkas, ii dušše guoktása gaskkas. Dađi eambbo in hálit kommenteret, lohká Skum Ávvirii. Son lasiha vel ahte ođđa skearru lea garra rock mii ii leat su šuokŋa.
– Dieđihin ahte in máhte čállit teavsttaid, dan geahččalin máŋgii čilget, nu ii leat duohta ahte in leat geahččalan bargat iežan barggu. Ožžon maid dieđu miessemánus, ahte Fred háliidii geassádit ja heaittihit joavkku, ja nu lunddolaččat loahpahit Duolva Duoddara. Dál moadde beaivve áigi bođii diehtu ahte galget Riddu Riđus čuojahit. Navden joavku lea heaittihuvvon, in ožžon dieđu čuojaheame birra, nu leat lihccon mu eret, loahpaha Skum.
– Ieš heaitán
Ivan Andre Johansen Skum lea bággehallan guođđit Duolva Duottar joavkku, sivvan dasa čilge joavkku buvttadeaddji Audioland Klemet Anders Buljo, ahte Skum ii leat čuovvolan barggu gái- bádusaid maŋemuš jagiid.
– Duolva Duottar doaibmá de go fitnodat, eai leat dušše golbma dievddu lávddis, muhto joavkkus leat oktiibuot 7-9 olbmo main leat iešguđet lágan barggut, ja jus olmmoš ii buvttat mii gáibiduvvo barggus, de han maid vállje ieš heaitit, muitala Klemet Anders Buljo.
Giđđat ožžon dieđu
Klemet Anders Buljo lohká ahte Skum oaččui mannan dálvve maŋemuš vejolašvuođa buvttadit ja ráhkkanit konsearttaide, muhto dan ii dahkan.
– Giđđat oaččui dieđu ahte ii leat joavkkus šat ja diehtá bures siva dasa. Joavkkus lea maid lonuhuvvon eará olbmot, lohká Buljo.
Ii mielde ođđa skearrus
Duolva Duoddaris lea boađi boađi ođđa skearru, mas leat ollu rievdadeamit ja ođđa lávlagat.
– Ivan lea unnán mielde lávlagiin, ja livčče ártet ahte golmmas leat lávddis go leat guovttis mat ovdanbuktet lávlagiid. Son lea mearrádusa váldán ahte ii buvttat maidige, iige leat beroštan ráhkkanit konsearttaide. Son lea vihtta jagi ožžon vejolašvuođa doaibmat, muhto lea ieš válljen ahte ii boađe studioi dalle go lea šihttojuvvon. Oainnán sosiálamediain ahte čuoččuhuvvo leat lihccojuvvon ja ahte lea givssiduvvon, dat ii leat duohtavuohta. Ii leamašan eambbo dramatihkka go maid lean čilgen, árvidan ahte son ii leat ieš muitalan olles veršuvnna iežas oahppásiidda, ahte lea ieš válljen heaitit, dadjá Buljo.
Eará ambišuvnnat
Son deattuha gánddat ledje dušše bárehuoččat go joavku ásahuvvui ja lea lunddolaš ahte joavkkumiellahtuin sáhttet boatkanit geainnut.
– Guoktásiin lea eará ambišuvnnat go Ivanis. Lea nu go álggus čilgejin, dá lea bargosadji ja lea čielga njuolggadusat bargguide, go ii doaimmat de dagaha váttisvuođaid. Ii leat eambbo dramatihkka, loahpaha Klemet Anders Buljo.
inga@avvir.no