Máilbmi bođii Sápmái
Sápmi dávjá vuolgá máilbmái, muhto muhtumin gal maid máilbmi boahtá Sápmái. Mannan vahkkoloahpa lávlluiga Niko Valkeapää ja Elle Márjá Eira ovttas muhtun máilmmi beakkáneamos rockartisttaiguin.
Geahččit šiggot sin geat eai lean vel jaskkodan go Elle Márjjá Eira jietna gullogoahtá. Álggos vuollegaččat, dasto garraseappot, seammás go musihkkárat fátmmastit ritmmaiguin ja riffaiguin su jiena.
Beakkán ustibat ásahedje festivála
Jus don leat badjel 40-jahkásaš, de dus árvideames lea juogalágán oktavuohta joavkkuide R.E.M. ja Led Zeppelin. Soaittán gullan sihke Dream Syndicate ja Sleaterkinney birra. Dáid joavkkuid miellahtut bohte meastta soaittáhagas Čáhcesullui skábmamánu 2015:s. Mot lei dat vejolaš?
Muhtun jagiid dassái ozai dáiddár Michéle Noach lobi beassat orrut Finnmárkku fylkkagieldda guosseatelieras Čáhcesullos. Son jearai dalle sáhttá go váldit vel mielde muhtun ustibiid. Dát ustibat ledje earret earáid John Paul Jones (Led Zeppelin), Peter Buck (R.E.M.), Mike Mills (R.E.M.), Lucy Parnell (Sleater-kinney) ja Steve Wynn (Dream Syndicate). Seavdnjadeamos skábman lágidedje guokte konseartaeahkeda Čáhcesullos, ja nu lei ge Ice Station ásahuvvon. Dát lei hui stuora
sukseassa. Sihke musihkkárat ja báikki olbmot háliidedje dán geardduhit, muhto dán vuoru jagi čuovgadeamos áiggi ges ja idjabeaivvážis. Beannot jagi maŋŋel lei ge Sun Station ges duohtandahkkon.
Musihkalaš duealla
Vuorraset dievdu čuojaha garraseappot ja garraseappot mandoliinnain, ja Elle Márjá vástida. Dievdu lea John Paul Jones, gii lea multiinstrumeantalista, eanemus dovddus Led Zeppelin joavkku bássačuojaheaddjin. Dat lea joavku mii lea ožžon nana saji musihkkahistorjjás. Ahkeerohusat eai dovdo go soai musihkalaččat hástaleaba nubbi nuppi lávddi alde. Mandoliinna ritmmat ja
juoigan mii gullogoahtá čuoddjilabbot ja čuoddjilabbot darvviha guldaleddjiid geat sugadit ritmmaid mielde. Musihkalaš replihkat bohtet jođáneappot ja jođáneappot. Eira ja Jones geahččaba nubbi nubbái ja ritmá šaddá vildasit ja vildasit, dassážii go fáhkkestaga loahpaheaba.
Sullii dego luohti mii fáhkkestaga nohká. Giehtaspeažžun dávista ja váldoolbmot mojohallaba ja dollesteaba jođánit muođuiddiskka oktii. Earenoamáš musihkalaš artisttat leat deaivvadan ja geahččit njulgestaga ráhkistit dan.
Linis ja smirros
Čáhcesullo álbmogii lea festivála leamašan dego vuoitit musihkalaš lotteriijas, miljon vuoitu sin
iežaset deaivvadanbáikái, Vårbrudd nammasaš báikái. Doppe lágidit adnongálvogávppiid rájes suohkanstivračoahkkimiidda, ja dál maid konsearttaid máilmminásttiiguin. Jahkásaš festiválas Varangerfestivalenis lea maid Vårbrudd báiki okta konseartabáikkiin. Dan vaikko vel ii leat ge sierra latnja artisttaide lávddi duohken. Sii šaddet vázzit konsearttabáikki čađa go galget eret lávddi alde. Olu čuovgi čalmmit čuvvot sin go vázzájit lávddi ala ja fas eret.
Niko Valkeapää šuoŋalaš juoiganjietna čatnasa Peter Buck, Corin Tucker ja Frode Strømstad gitárrašuoŋaide. Mike Mills bássačuojahemiin ja Arne Kjelsrud Mathisen rumbodearpamiin šaddá dat
buot dego litna bohccoáđa seaguhuvvon smirros buđetlasttaiguin main lea hui veaháš chilimáistu. Guldaleaddjit návddašit ja oro vel nu ge ahte musihkkarat ieža maid návddašit dákkár jietnageavaheami maid eai leat ovdal vásihan.
Ánte-lávlagiin irgalii
Dáppe leat olu gitárrat. Eanemusat besset guldaleaddjit gullat vihtta gitárračuojaheaddji čuojaheame oktanaga, go dáppe seaguhuvvojit musihkkárat ja joavkkut, ja dat varra lea stuorámus fánssaide hui miela mielde. Sis lea oktiibuot máŋgačuođi jagi vásáhus bargat musihkain, ja eatnasat hálddašit máŋggaid instrumeanttaid, nugo ovdamearkka dihte namuhuvvon John Paul Jones dahká. Guldaleaddjit šiggot sin geat vigget hupmat garrasepmosit go Jones čohkkeda piano duohkái lávlut balládaid.
«Manne galgá eadni gánda leat nu bivnnut jo...»
Oanehis sekundda maŋŋel orro doalloviesudáhkki dego loktaneame go geahččit oktii njálmmiid lávlestit mielde. Scritti Politti joavkku Rhodri Marsden lei oahppan lávlaga teavstta bures! Dánsunjuolggit lihkadišgohtet go joavku čuojaha Olsenbanden tv-ráiddu musihka. Madsen lea dahkan buori ovdabarggu, ja vállje čuojahit golbma Norgga dovddus Tv-ráidduid musihkaid. Go čuojahit Norge Rundt musihka vel, de duođaštuvvo ahte dáinna vugiin irgalit gehččiide doaimmaid hui bures.
Geahččit eai gárron vuolgit
Vårbruddas loktana miellaláhki ija mielde, muhto olbmot leat stáđđásat. Musihkka mii lávddi alde gullo lea deháleabbo go juhkanlásiid sisdoallu. Hubmámusat leat geassádan olggumussii konseartabáikkis. Giehtaspeažžun lea jur šordohahtti, iige das oba oro ge geahči go Dream Syndicate lea maŋemus lávlaga čuojahan. Ovddemus ráiddus lávddi ovddabealde eai lihkas ge geahččit. Manne galggaše dan? Buohkat áigot vel dan stuora finála - dan seamma lávlaga mii Ice Station festiválas čuojahuvvui. Musihkkárat bohtet mojunjálmmiid ruovttoluotta, ságastallat oanehaččat lávderavddas ovdal fas dohppejit gitáraid. R.E.M. lávlla «Don`t go back to Rockville» oažžu gehččiid lávlugoahtit mielde ja dovdo ahte geahččit geat leat vihtta diimmu čužžon orrot lihkolaččat. Eira ja Valkeapää lávluba veahkkin ja soai ja earát rámiduvvoba gehččiid mojiiguin ja giehtaspeažžumiin.
Guokte konseartta mannan vahkku ledje áibbas dievva, ja goappašat eahkediid adde artisttat ja musihkkárat nana muhto seammás veaháš guovttelágan konseartavásáhusaid gehččiide. Go dákkár sukseassa lei, de varra šaddá boahtte jagi maid Stationfestivála?