MEDÁLLJADOAIVVA Em-gilvvuin
Deanu heaibunsearvvi heaibu Synne Haagensen ovddasta Norgga nuoraid Eurohpámeašttir heaibumis Sarajevos Bosnias gaskavahkku. – In leamaš goassege nu buorre vuoimmis go dál. Lea doaivva vuoitit medálja jus manná bures, lohká son.
Norgga heaibunlihttu lea válljen gávcci nuora ovddastit Norgga nuoraid Eurohpámeašttir (EM) heaibumis Sarajevos Bosnias suoidnemánu 24. – 29. beaivvi 2017. Okta sis lea Deanu heaibunsearvvi Synne M. Haagensen. Searvvi hárjeheaddji Frode Gundersen muitala Haagensen heaibu gaskavahku ja dáidá velá duorastaga beassat heaibut. Gundersen lohká nieida lea ahtanuššan mealgat maŋimuš mánu go lea hárjehallan riikajoavkkuin.
– In leamaš goassege nu buorre vuoimmis go dál. Lean veaháš balus go gilvvus lea muhtin ruoŧŧelaš gii vuittii bronssa máilmmemeašttir heaibumis diibmá, muhtin uŋgara gii vuittii silbba EM heaibumis diibmá ja muhtin junior gii vuittii bronssa EM:S miessemánus. Galggan gilvalit 20 heaibu vuostá, maid juhket guovtti jovkui. Dárbbašan lihku go vuorbádit geat galget gean vuostá heaibut. Jus in dárbbaš sávrrimusaid vuostá álggos heaibut, de soaitá mus leat vejolašvuohta vuoitit medálja, lohká Synne Haagensen.
Son lea vuoitán golli guovtti Norggameašttir heaibumis ja golli Davviriikkameašttir heaibumis 2017.
Báhkkan ovddastit Norgga
Heaibunnieiddat leat Othelie Høie, gii gilvala 52 kilo luohkás, Synne Haagensen fas 56 kilo, Sofia Aak ges 60 kilo ja Kamilla Mogstad 65 kilo luohkás ja heibot friijastiilla ja gánddat fas greika-romalaš heaibuma.
Sarajevos Bosnias galgá leat hirbmat báhkka. Deanu nieida Synne Haagensen ii leat nu hárjánan dákkár báhkaide.
– Mii leat hállan ahte mii galgat juhkat olu ja ahte galget leat geahppa biktasat. Eatni lea rávven mu doarvái juhkat amas in šlietta, lohká Synne Haagensen, lasihastá:
– Sávan ahte vuoittášin medálja, livččii lean somá vuoitit. Jáhkán mus lea doaivva jus vuorbádeapmi manná bures. Leat ožžon dieđu eat galgga darrat. Lean buori vuoimmis ja galgat dušše návddašit gilvvu, moddjá Synne Haagensen.
Miella ovddastit Norgga
Synne Haagensen ovddasta Deanu heaibunsearvvi dan botta go vázzá Fredrikstad gávpogis Njunušvaláštallangymnása. Haagensen muitala son hárjehallá guktii beaivái, vuos guokte – golbma tiimmu skuvllas ja dasto velá seamma olu maŋŋelaš Atlas heaibunsearvvis.
– Mannan jagi ii mannan nu bures go mun buhcen dalle ja mus lei nu miella ovddastit Norgga. Lea maŋimuš jahki go beasan gilvalit nuoraidluohkás go mun deavddán 17 jagi dáid beivviid.
Nieiddat hárjehallet viššalit
Deanu heaibunsearvvi stivrajođiheaddji Ulf Børre Hansen mielas lea somá go heaibunsearvvi nieiddat birgejit nu bures sihke riikaviidosaččat ja riikkaidgaskasaččat. Son rámida nieiddaid hárjehallan áŋgirvuođa ja dáhttu ahtanuššat.
– Lea hirbmat somá go Norgga Heaibunlihttu lea válljen Synne Haagensena ovddastit Norgga go dan ánssáša duođaid. In áiggo Sarajevoi, muhto čuovun neahtas mielde mo suinna manná, lohká Deanu heaibunsearvvi stivrajođiheaddji Ulf Børre Hansen.