Flyviking geahčadan Guovdageainnu girdišilju
Ola Giaever finadii Guovdageainnus sotnabeaivvi, doppe lei geahčadeamen lea go vejolaš girdiin seaivut giláža girdišilljui.
Guovdageainnu sátnejođiheaddji, Johan Vasara, muitala ahte son ii lean ieš Guovdageainnus go Ola Giaever lei finadeame, muhto Giaever deaivvadii sin joavkojođiheddjiin Isak Mathis Buljoin. Giaever lei vuolgán Guovdageidnui geahččat makkár girdišillju lea, ja makkár vejolašvuođat gávdnojit.
Vasara rámida Flyviking
Johan Vasara lohká ahte fitnodagas lea buorre mearka go dustet ja geahččaladdet ođđa diŋggaid.
– Mun gal ferten rámidit Flyviking ja Ola Giaevera go dustet jurddahallat eará guvlui go earát leat dahkan, lohká Vasara.
Girdišilju jurdda ovdána
Dát goit čájeha ahte Guovdageidnui lea vejolaš seaivut, vaikko ii leat dulbejuvvon ii ge asfálta biddjon min girdišilljui, muitala Vasara. Son muitala viidásit ahte su mielas orru ovdáneame girdišilju jurdda ovttain lávkkiin go dát aktevra čájeha beroštumi.
– Mu mielas gal orru manname ovddasguvlui girdišilju jurdda mis, go lea okta aktevra gii čájeha beroštumi Guovdageidnui seaivut.
Vasara mielas lea buorre mearka go Flyviking árvvoštallá Guovdageainnu vejolaš báikin gosa álggahit maid girdima.
Oaččui jođánit vástádusa
Dálvet sáddejin bovdejumi Flyvikingii boahtit Guovdageidnui, minguin čoahkkinastit ja árvvoštallat Guovdageainnu destinašuvdnan sidjiide, muitala Vasara.
– Dat lea mannan issoras jođánit dan rájes go sáddejin bovdejumi sidjiide, dassážii go sii bohte deike, lohká Vasara.
Moadde hástalusa
Vasara muitala ahte su mielas leat guokte hástalusa mat čuožžilit jus deike galgá girdišillju huksejuvvot.
– Vuosttaš hástalus man oainnán lea investeren, lea go stáda vai priváhta girdišillju, lohká Vasara. Nubbi hástalus lea doaibma, makkár ruhtadilli lea ja lea go vejolaš doaimmahit girdišilju.
– Muhto in leat balus ahte girdišilju ii leat vejolaš doaimmahit Guovdageainnus. Stáhtas gal gávdnojit doarjagat dasa, ja Guovdageaidnu manná gáibádusaid vuollai, lohká Vasara.
Vaikko diet doarjagat ledje álgoálggus várra jurddahuvvon Lulli-norgga siseatnanbáikkiide, de deavdá Guovdageaidnu maid gáibádusaid ja de lea vejolaš Guovdageidnui maid oažžut doarjaga, muitala Vasara.
Girdišilljohuksenfitnodat mielde Guovdageainnus
Ola Giaeveris lei mielde Tronrud fitnodat go finai Guovdageainnus, ja dainna lea Johan Vasara maid hirbmat duhtavaš. Son muitala ahte Tronrud lea ovdal leamaš mielde hukseme girdišilju eará guovlluin, ja Vasara mielas lea ge de hirbmat buorre mearka go lea ožžon dakkár fitnodaga vel fárrui Guovdageainnus finadit.
Ávvir ii fáhten Ola Giaevera ságaide dán áššái, iige Isak Mathis Buljo.