RÁHKKANA biilacross riikafinálaide
14-jahkásažžan viimmáskii son vuodjit biilacrossa vaikke rievtti mielde ii lean ge lohpi. Dál logi jagi maŋŋil gilvala NMK (Norsk Motor Klubb) riikafinálas Sigdalas.
Mika Josefine Bråthen Haetta lei juste vuolgán biiladivohagas go Ávvir riŋgii sutnje. Son lei jur aiddo otnážii geargan skruvvemis iežas gilvovuojána, Peugeot 206 biilla. Haetta muitala son lea measta olles beaivvi skruvven biilla ja dál de viimmat álgá biillas šaddat gilvobiilla hápmi.
Áhči biigá
Haetta muitala son lei 14-jahkásaš go viim- máskii vuodjit biilacrossa, muhte livččii ovdal juo álgán jus livččii beassán. Lobálaš ahkemearri vuodjit biilacrossa lea 15 jagi, muhto Haetta beasai álgit veahá ovdal hárjehallat, juste ovdalaš go devddii 15 jagi.
– Mu áhčči, Jostein Haetta, álggii vuodjit biilacrossa moadde jagi ovdal go mun álgen, ja mu mielas orui dat nu somá ja gelddolaš. Jurddašin mus lea bággu geahččalit vuodjit biilacrossa, ja mun de viimmat bessen geahččalit vuodjit go devden 14 jagi, ja nu buollái ge mu biilacrossaberoštupmi, muitala Haetta.
– Lea hui somá go mus ja áhčis lea oktasaš beroštupmi. Moai skruvvejetne biillaid fárrolaga, hárjehalle ovttas ja mátkkoštetne gilvvuide fárrolaga. Mu mielas lea hui somá ja earenoamáš go letne nu lihkolaččat ahte munnos lea oktasaš beroštupmi ja besse dán dáfus leat hui olu fárrolaga. Dieđán máilmmis leat olu nieiddat geain eai leat makkárge oktasaš beroštumit sin áhčiiguin, muitala Haetta.
Unnán hárjehallan
Vaikke son searvá ge gilvvuide feara gos, de lea unnán beassan hárjehallat.
– Mun álgen vuodjit čieža jagi áigi, ja Áltái bođii easka diibmá dohkálaš biilacrossašillju. Ovdal dan mun lávejin fertet vuolgit Romsii jus áigon hárjehallat ovdal gilvvuid. Muđui mun in beassan hárjehallat earet go dalle go ledjen gilvaleame ja juste ovdalaš gilvvuid, muitala Haetta.
Sigdalii mátkkoštit
Sigdal, guovlu gos Haetta galgá gilvalit, lea 400 miilla eret Álttás, Buskerud suohkanis. Dohko Haetta vuolgá iežas etniin ja áhčiin.
– Mii galgat vuodjit dan 400 miilla campingbussiin mas vel lea gálvojorri ja gilvobiila maŋis. Lea gal oalle guhkes mátki ja hui sihkkarit šaddá lossadin mátkkoštit ná stuora biillain, muhto dat lea dan veara, muitala Haetta.
– Min fárrui soitet vel vuolgit muhtimat mu bearrašis ja muhtin olbmát, muhto in leat vel áibbas sihkar gii dahje geat vulget fárrui. Sii gal meinejit ieža vuodjit biillaiguin Sigdalii go min campingbusses lea dušše guđa olbmui sadji, muitala Haetta.
NMK Modum ja Sigdal gilvvut
Gilvu masa Haetta galgá searvat lea dušše nissoniidda ja lea nissonolbmuid riikafinála Nmk-gilvvuin.
– Galggan gilvalit sulaid 70 nissoniin.