Valáštallit dehálaččat servodahkii
Geasseáigge leat olu valáštallamat gos maiddái sámenuorat birgejit bures. Diibmá šattai Niillasjovnna Laensman Eurohpámeašttir čáhcecrossavuodjimis, dán jagi lohká alddis doaivaga bures birget dán geasi gilvvuin.
Otná Ávviris beasat ges lohkat guokte nuorra nieidda birra, geat gilvaleaba goappáge suorggis. Deanu heaibu Synne M. Haagensen heaibu Emgilvvuin Sarajevos dán vahkku. Álttá nieida Mika Josefine Bråthen Haetta gilvala ges Norsk Motor Klubb riikafinálas borgemánus.
Mis leat olu valáštallit Sámis geat birgejit bures iežaset surggiin, muhto dát olahusat eai boađe nuvttá.
Smávva báikkiin váilot valáštallan- ja hárjehallanvejolašvuođat daid surggiin mat eai leat nu dábálaččat. Mika Haetta muitala iežas unnán beassan hárjehallat iežas suorggis, go lagamus hárjehallanbáiki lei Romssas gitta diimmážii. Liikká lea son bures birgen gilvvuin.
Deanu heaibunsearvvi heaibut ges gal leat olu jagiid jo birgen bures, maiddái riikkaidgaskasaš gilvvuin. Signe Marie Fidje Store, guhte álggos heaibugođii Deanu Heaibunsearvvis, ovddastii diibmá Norgga Olympiagilvvuin. Son dattetge maid muitalii ahte dát olahus ii boahtán nuvttá, ja ahte son lea gaskkohagaid rahčan valáštallanmovttain.
Ii leat amas ášši ahte sii geat háliidit guhkás olahit iežaset valáštallansuorggis, šaddet olu ieža rahčat ja ruđa maid golahit jus áiggožit ovdánit. Sin bargu maid dávjá ii oaččo nu olu ánssu, go sii han «dušše» valáštallet. Muhtimat soitet oaivvildit ahte sin bargu lea dušši, eai ge sii daga maidege servodaga ovddas.
Norgga dutkamat čájehit ahte buorit valáštallit leat buorit servodahkii. Sii dagahit ahte gehččiid iešdovdu nanosmuvvá, sii liikojit leat norgalažžan ja dahket buoret barggu bargosajis maŋŋil go leat leamaš positiiva valáštallanvásáhusat. Valáštallit čohkkejit álbmoga, ja Sámis adnojit maid dakkár olbmot, erenoamážit go min álbmot lea jo háddjejuvvon earret eará riikkarájáid geažil. Sámis eai leat nu galle valáštalli geat leat bajimus dásis, muhto dan moaddása berrešeimmet movttiidahttit ja doarjut, go sii dahket buori min servodahkii.
Lea maid dehálaš ahte maiddái sámenuorain leat valáštallit geat sáhttet leat dearvvašlaš ovdagovvan sidjiide, geaidda sii sáhttet relateret, go dain lea sullasaš duogáš go alddiineaset.
Valáštallit čohkkejit álbmoga, ja Sámis adnojit maid dakkár olbmot, erenoamážit go min álbmot lea jo háddjejuvvon earret eará riikkarájáid geažil.