Sámi huksenprošeavtta loahpahančalmmusteapmi
Prošeakta «Sámi visttiid identifiseren ja registreren» loahpahuvvo 2017:s. Dan háliida Sámediggi čalmmustahttit.
Dan oktavuođas bovde Sámediggi, Riikaantikvára ja Dálkkádat- ja birasdepartemeanta Gonagaslaš Majestehta Kruvnnaprinssa Haakona oassálastit loahpahančalmmusteapmái maŋebárgga borgemánu 29.beaivvi. 2017:s dii. 10.30 Gállogietti olgomuseas, Evenášši suohkanis.
Plassje rájes gitta Detnui
Sámediggi lea ovttas Riikaantikvárain ja Dálkkádat- ja birasdepartemeanttain identifiseren ja registreren sámi visttiid mat leat huksejuvvon ovdal 1925. Prošeavtta áigumuš lei oažžut ovdan dieđuid ráfáidahttojuvvon sámi visttiid Norggas. Prošeaktaáigodagas 2011 rájes leat registrerejuvvon sullii 800 vistti, Plassje rájes lulde gitta Deanu rádjai davvin.
Dieđut sámi servodaga ja ovttaskas bearrašiid ja sogaid birra
Sámedikki presideanta Vibeke Larsen dadjá ahte registreremat lea mielde oainnusin dahkamin sámi kultuvrra ja identitehta sihke báikkálaččat ja riikka viidosaččat.
– Visttit leat dehálaš gáldun máhttui ja historjái sámi báikegottiid birra miehtá riikka. Visttiid bokte oažžut dieđuid sihke sámi servodaga ja ovttaskas bearrašiid ja sogaid birra doppe gos visttit leat geavahuvvon buolvvaid čađa, dadjá Sámedikki presideanta Vibeke Larsen preassadieđáhusas.
Rabas buohkaide
Dálkkádat- ja birasminister Vidar Helgesen ja riikaantikvára Jørn Holme boahtiba maid doaluide. Loahpahančalmmusteapmi lea rabas buohkaide ja doalut leat dán áigodagas dii. 11.00-13.30. Maŋŋel čalmmusteami Gállogiettis galgá Kruvnnaprinsa fitnat Borris Skániin gos son galgá geahččat sámi láđu mii lea sullii 1850 – logu rájes, ja maid leat ođasteame.