Einnostii dulvvi HÁVGGAVUOIVASIIN
Dál rahpasa fargga borgemánnu ja ain lea hirbmat dulvvis, muhto dan gal lea Ole Georg Balto giđa rájes diehtán. – Lean oaidnán ahte dán jagi lea geasi dulvi, mii bistá gitta čakčii, lohká son.
Kárášjohkalaš Ole Georg Balto láve einnostit čázi jogain ja jávrriin juohke jagi, ja son lea dahkan dan nu guhká ahte lea šaddan árbevierrun.
Geahččá hávggas
Balto muitala ahte son láve geahččat hávggas makkár čáhci jogain ja jávrriin lea gesiid.
– Láven bivdit hávgga giđđat, ja go gottán hávgga, de das oainnán dárkilit makkár čáhci lea jogain ja jávrriin geasset, muitala Balto.
Vuoivvas ovtta gasu
Balto láve geahččat hávgga vuoivasis makkár geassi šaddá, ja muitala ahte das soahpá geasi oaidnit hirbmat dárkilit.
– Lean geahččan hávgga vuoivasa olu jagiid, ja das oainnán makkár geassi šaddá. Dán jagi lei dat vuoivvas gassat ja hui ovtta gasu, ja dat mearkkaša ahte dán geasi lea dulvi mii bistá gitta čakčii, muitala Balto. Ja Kárášjogas leage dán geasi leamaš dulvvas olles geasi.
Coahki ii bistte guhká
Hávggas man Balto gottii, lei vuoivvas veahá seakkit gasku, ja dat mearkkaša ahte jávrrit ja jogat cohkot veahá.
– Lea váttis oaidnit juste goas cohkot, muhto coahki ii aŋkke bistte guhká, go vuoivvas gassu fas. Soaitá dán vahkku coahkut, muhto dan in gal sáhte dadjat sihkkarit, muitala Balto.
Ferte giđđat geahččat
Balto muitala ahte go galgá jávrriid ja jogaid čázi einnostit, de ferte giđđat bivdit hávgga.
– In dieđe gal manne juste dalle galgá geahččat vuoivasa, muhto nu mun lean oahppan. Ferte giđđačázis bivdit, ovdal go johka coahku, muitala Balto.
Árbevierru doallá deaivása
Balto dahká dán juohke giđa, ja lohká ahte juohke geassi lea šaddan nu mo hávgga vuoivvas čájeha.
– Dat lea álo doallan deaivása, juohke jagi, dadjá Balto.
Balto muitala ahte son einnosta čázi jogain ja jávrriin juohke jagi, vai beassá oaidnit makkár geassi šaddá.
– Dat lea nu vierrun šaddan, oaidnit makkár geassi šaddá. Lea šaddan jo árbevierrun munnje, dadjá Balto.
Dovdá eará dálkemearkkaid
Balto muitala iežas dovdat maiddái eará dálkemearkkaid, sihke dálveja geassedálkkiid.
– Go leat ollu dakkár balvvat mat leat dego sávzzaullu, de muitala arvvi jándora sisa. Jos lea bajándálki go jávrriin lea vel jiekŋa, de šaddá čoaska geassi, muitala Balto.
Váddásut bivdit
Deanučázádaga guolástanhálddahusa direktevra Hans-erik Varsi muitala ahte dán jagi lea leamaš váddásut bivdit dulvvi dihte.
– Sihke fierbme- ja gáddebivdu lea leamaš váddásut dán jagi, ja lea veahá earálágan dán jagi, dulvvi dihte. Dán jagi lea várra fanasbivdu buoremus, vaikko dat lea maid váddásut, dadjá Varsi. Varsi muitala maiddái ahte dán jagi leat olbmot šaddan ohcat ođđa buođđo- ja fierbmesajiid dulvvi geažil.