Bellodagat ja boazodoallu
Dál lea válgajahki ja bellodagat leat almmuhan válgaprográmmaideaset. Otná Ávviris beasat lohkat maid dat iešguđet stuorradiggebellodagat čállet boazodoalu birra iežaset válgaprográmmain. Eanaš bellodagat leat namuhan boazodoalu earret go Miljøpartiet de Grønne. Bargiidbellodat (Bb) gal lea almmuhan olles prográmma mas lea sáhka sin boazodoallopolitihkas boahtteáiggis, dán birra besset lohkat ievttá Ávviris.
Eanaš bellodagat eai leat diehttelasat nie vuđolaččat go Bb gal čállán boazodoalopolitihkaset birra, muhto olu bellodagat leat oalle ovttaoaivilis olu áššiin. Eanas bellodagat čállet ahte boazodoallu lea hui dehálaš ealáhus Norgga boazosámiide ja Norgga kultuvrras, ja ahte das galggašii váldit bures vára. Muhto eai buot bellodagat čále movt sii meinejit váldit vára boazodoalus.
Dattetge diehttelasat vuhtto ahte boazodoalloealáhus ii leat mihkkege stuorra ealáhusaid Norggas, eai ge dan ealáhussii gula nu olu jienasteaddjit ge. Danne árvideames eanaš bellodagat oalle jorbasit, geahppasit ja oanehaččat čilgejit ge iežaset boazodoallopolitihka.
... Boazodoallu ii leat dássážii gal leamaš dakkár ášši mii gomiha dážabellodagaid ovttasbarggu, dáidá baicce dušše bákkolaš oassi juohke válgaprográmmas.
Risttalaš álbmotbellodaga čálus lea veahá earálágan, go sii háliidit ahte badjeolbmot ieža galget ovddidit dárbbuideaset ja áššiideaset sidjiide, vai bellodat dieđášii mo sáhttet ovdánahttit dán ealáhusa. Dat lea hui čáppat gullat, go dáinna lágiin dego čájehit ahte sii háliidit gullat dain geat dovdet dili buoremusat. Muhto vaikke dat lea ge čáppat oaidnit, de maid čájeha ahte sis dáidá leat diehtemeahttunvuohta boazodoalloáššiid dáfus, eai ge soaitte návccaid ge bidjan iskat daid.
Muhtin eará bellodagain ges gal orru veahá eambbo máhttu boazodoalu birra ja sis leat oalle čielga áššit maid namuhit boazodoalu birra, nu mo boraspiret, sisabahkkemat, divadat ja nu ain, dat čájeha ahte leat geahččalan geahčadit mat leat áigeguovdilis áššit boazodoalus ja vuoruhan daid bidjat iežaset prográmmii.
Dattetge lea váttis jáhkkit bellodagaid lohpádusaide, ovddit válggain ledje maid olu lohpádusat. Earret eará divat-ášši lei juoga man dálá ráđđehusbellodagat ledje belohahkii lohpidan čoavdit ovdal go besse ráđđehussii, go de besse dohko, de dát áššit ja olu eará sámeáššit jávvásedje ja hávke eará áššiid sisa main ledje stuorát váikkuhusat servodahkii. Go vuite válggaid, de álge oainnat soabadeamit ráđđehusbellodagaid gaskkas, ja šaddet válljet áššiid maid hárrái leat ovttaoaivilis ja maid háliidit vuoruhit ráđđehus ovttasbarggus, ja boazodoallu ii leat dássážii gal leamaš dakkár ášši mii gomiha dážabellodagaid ovttasbarggu, dáidá baicce dušše bákkolaš oassi juohke válgaprográmmas.