Ollu mátketelefovdnavahágat mátkkiin
Ná olu mátketelefovnnat eai leat goasse ovdal dieđihuvvon dáhkádusfitnodagaide. Maŋimuš jagis leat 31 000 mátketelefovnna suoláduvvon dahje cuovkanan. Dan čájehit Frende dáhkádusfitnodaga logut.
– Logi proseantta buot mátkevahágiin diibmá guske mátketelefovnnaide, ja dat muitala man olu dat suoláduvvojit ja cuov- kanit, dadjá Petter Lassen, gii lea Frende mátkevaháthoavda. Finans Norge loguid mielde registrerejuvvojedje diibmá lagabui 312 000 mátkevahága.
Eai govčča cuovkanan telefuvnnaid
Oallugat doivot ahte dábálaš mátkedáhkádus gokčá jos gahčaha mátketelefovnna eatnamii dahje merrii, dahje jos vajálduhttá mátketelefovnna restoráŋŋii. Vahágat go cuvke mátketelefovnna eai dábálaččat gokčojuvvo. Lea dábálaš ahte mátkedáhkádus gokčá go mátketelefovdna suoláduvvo go lea du hálddus.
– Vahágat go gahčahat mátketelefovnna eatnamii, merrii dahje sullasaš dáhpáhusat sáhttet gokčojuvvot stohpogálvodáhkádusain mas lea vahátgokčan, muhto leat oallugat geat eai dieđe dan. Iskka lea go du stohpogálvodáhkádusas vahátgokčan miehtá máilmmi ja man stuora oasi dat gokčá, dadjá Lassen.
Rávvagat
Mátkevaháthoavdda Lassena rávvagat mo garvit ahte telefovdna cuovkana dahje suoláduvvo:
– Bija mátketelefovnna dohko gos ii njuoskka, ja suddje mátketelefovnna nu ahte ii cuovkan. Ale guođe mátketelefovnna gosage. Muitte maiddái ahte telefovdna sáhttá suoláduvvot jos geaigá lupmas olggos, dadjá Lassen.