– BUOT orohagain galggašii dákkár
Skuohtenjárgga velforeninga jođiheaddji, Marit Kirsten Guttorm, lohká sin jurddašit giliolbmuid ja boazodolliid birra go leat diŋgon váibmovuolgaga.
Diehtit sihkarvuođa birra
Váibmovuolgga lea diŋgojuvvon ja lea fargga doppe. Váibmovuolggageavaheapmái dollojuvvo kursa, velforeninga miellahtuide ja orohatolbmuide.
– Kursa lea min dihtii vai mii diehtit sihkarvuođa birra jus heahti čuožžila, lohká Guttorm.
Ii gula politihkalaš bellodahkii
Son muitala ahte velforening ii gula Skuohtenjárgga boazodoallosiidii ii ge makkárge politihkalaš bellodahkii. Velforening álggahuvvui 2011 geasi, ja áigumuš dainna lea miellahttoberoštumi orohagas fuolahit, ovdamearkka dihte olmmošlaš ja fysalaš birrasa ala bargat ja orohat olbmuid loaktimis ja sihkarvuođas beroštit. Searvvi áigumuš lea maid geahččalit birasgáhttemis fuola atnit.
Son lohká maid go sii áigot beroštit orohaga sihkarvuođas, de lea váibmovuolgga okta dain áššiin mii lei sin áigumuš.
Lihkku go ii leat vel dáhpáhuvvan mihkke
Váibmovuolggageavaheapmi lea jurddahuvvon ovdamearkka dihte boazodolliid bargguid áigge, nu go garddástallamis, ja dalle galgá dat leat olámuttos.
– Danne mii leat oastán dán, go galgá leat vejolaš geavahit dan bargguid áigge jus lea dárbu. Go doppe leat nu ollu olbmot, mánát, nuorat, gaskaahkásaš olbmot, boares olbmot, olbmot geain lea váibmosivva, ja buohkat leat gárddi siste ja váikko mii sáhttá de dáhpáhuvvat. Muhto lea lihkku go ii leat vel dáhpáhuvvan mihkke dakkár duođalaš ášši, lohká Guttorm.
Imaštallá ii go boazodoalus leat gáibádus dasa
Marit Kirsten lohká iežas imaštallat manne orohagain ii leat váibmovuolggahanmašiidna, ja imaštallá manne dán áigge ii leat dakkár go HMS (Dearvvasvuohta, biras ja sihkkarvuođđadoaimmat) gálgá buot bargosajiin. – Ii go boazodoalus leat gáibádus, vai ii go orohagain leat beroštupmi dasa, imaštallá son.
Stivra ja miellahtut leat ieža fuomášan diŋgot váibmovuolggahanmašiinna, ja jurddahan ahte dat gal adnošii.
– Jus mii galgat mange láhkái ávkin iežamet olbmuide, de lea diet okta diŋga mii sáhttá leat ávkin, loahpaha Guttorm.
Dál lea Skuohtenjárgga Velforening háhkamin váibmovuolggahanmašiinna. Okta ágga manne sii leat diŋgon dan lea vai sihke boazodoallit ja báikkiolbmot galget dovdat oadjebasvuođa.
NBR bargamin áššiin
Norgga Boazosápmelaččaid Riikkasearvvi jođiheaddji, Ellinor Marita Jåma, lohká sin guorahallamin ahte leat go orohagat gos lea váibmovuolggahanmašiidna. Su mielas galggašii leat bággu orohagain dakkár mašiidna, ii ge loga iežas diehtit ovttage orohaga mas lea dakkár mašiidna.
– Mu mielas lea ihána dehálaš ahte orohagain lea váibmovuolggahanmašiidna, lohká Jåma.