– DIEĐIT jus bohcco njeaiga vuoját
Mannan sotnabeaivvi váidui biilavuoddji go lei vuodján bohcco njeaiga, iige bisánan. – Menddo ollugat dahket dan, vaikke ii manat bonusa jus dieđiha, dadjá NBR jođiheaddji Ellinor Marita Jåma.
Riikageaidnu 94:s, Mártejoga buohta Hámmárfeastta ja Fálesnuori gaskka, vuddjui boazu mannan sotnabeaivvi. Biilavuoddji lea váidon, go ii bisánan iskat mo bohccuin manai.
Dan dieđihii Finnmárkku politiijaguovlu Twitteris.
Dutkamin ášši
Vihtanat dat dieđihedje dáhpáhusa birra politiijaide.
– Politiijat leat dutkamin ášši, go okta boazu lea vuddjon. Mii eat dieđe vel lea go boazu lápmašuvvan, muitala Finnmárkku politiijaguovllu politiijabálvá Jan Vidar Wigelius Ávvirii.
– Elliidbiinnideapmi jus it dieđit
NBR ovdaolmmoš Ellinor Marita Jåma muitala ahte dávjá vásihit ahte olbmot báhtarit go leat vuodján bohcco njeaiga, eai ge iskka mo bohccuin manná. Sutnje lea dát áibbas áddemeahttun.
– Lea áibbas issorat go olbmot báhtarit go leat vuodján bohcco njeaiga, eai ge iskka makkár vuoimmis ealli lea. Jus ealli lea lápmašuvvan, ja dat ii dieđihuvvo, de han dat lea elliidbiinnideapmi. Lea áibbas áddemeahttun go olbmot eai dieđit dan.
Jåma lohká maid iežas jáhkkit olbmuid ballat bonusa massimis ja dáhkádus ii govčča vahágiid.
– Danin berrešii dát diehtu almmuhuvvot olbmuide – ahte dáhkádus duođai gokčá goluid go vuodjá bohcco njeaiga. Mu mielas dáhpáhuvvá menddo olu ahte olbmot báhtarit, muhto mis leat lihkus maid dat geat dieđihit go leat vuodján bohcco njeaiga, dadjá son.
Vahát lea vahát
– Ii ruhta sáhte buhtadit elliid. Maiddái ekonomalaččat čuohcá dát badjeolbmuide. Badjeolbmot šaddet maid oaidnit iežaset bohccuid go biidnašuvvet, ja dat čuohcá dieđusge olbmui, čilge NBR jođiheaddji ja hásttuha buohkaid dieđihit jus leat vuodján bohcco njeaiga.
Bággu veahkehit
Geaidnojohtolatlága 12. paragráfa muitala ahte juohkehaččas lea geatnegasvuohta bisánit johtolatlihkohisvuhtii veahkehit olbmuid dahje elliid mat leat roasmmehuvvan, jus dárbu. Elliidčálgolága 4. paragráfa ges muitala ahte juohkehaš, guhte oaidná ealli mii lea skibas dahje lápmašuvvan, galgá veahkehit ealli nu bures go lea vejolaš. Jus ii leat vejolaš veahkehit ealli, de galgá politiijaide dahje ealli eaiggádii dieđihuvvot dakkaviđe.
– Jus vuodjá bohcco njeaiga, de lea bággu dieđihit mii lea dáhpáhuvvan, ja gos dat lea dáhpáhuvvan, dadjá politiijabálvá Jan Vidar Wigelius.
Dáhkádus gokčá goluid
Máŋgasat soitet ballat ahte šaddet máksit sihke bohcco ja biilla vahágiid. Duohtavuođas máksá ovddasvástádusdáhkádus bohcco buhtadusa boazoeaiggádii, ja káskodáhkádus gokčá biilavahágiid, muhto soaitá šaddat iežasoasi máksit.
– Jus dieđihat ahte leat bohcco njeaiga vuodján, de it masse iežat dáhkádusbonusa, lohká politii- jabálvá.
Šaddá divrrasin jus gávnnahalat
Wigelius jáhkká ahte sáhttá eastadit olbmuid báhtareames dákkár bárttiin jus dihtet ahte dáhkádus biilalihkohisvuođas buhtada vahágiid jus lea vuodján bohcco njeaiga.
– It soaitte dárbbašit go iežasoasi máksit jus leat vuodján bohcco njeaiga, muhto jus gávnnahallá báhtareamis, de oažžu garrasat ráŋggáštusa. Dábáleamos ráŋggáštus das lea moadde duhát ruvdnosaš sáhkku, čilge Wigelius.
Mii leat geahččalan fidnet Fálá orohaga ovdaolbmo ságaide dán áššis, muhto eat leat lihkostuvvan.