Fas gollebassangilvu Bassevuovddis
Lávvardaga suoidnemánu 29. beaivvi lea gollebassangilvu Bassevuovddis Anárjogas.
Bassevuovddi golle- ja meahcceleaira, man Doris Norbye jođiha, dat lágida gollefeastta. Báiki lea sullii gávcci miilla eret Kárášjogas, dahje 65 kilomehtera Suoma rájás, Gáregasnjárggas.
Joatká isit-rohki barggu
Mannan gilvvut ledje 2013:s, ja dat leige jahki go Bassevuovddi «vákta» ja áŋggirdeaddji Nils Peder Eriksen jámii. Dan rájes lea ádjánan veahá ovdal su leaska Doris Norbyei lei gearggus doaimmahišgoahtit Bassevuovddi golleja meahcceleairra.
– Lean oahpásmuvvan gilvvuin ja dieđán mo dat doaibmá, ja dál leange gearggus joatkit árbevieruin man mu isit-rohkki álggahii, ja dán jagáš gilvvut leat ge muitun sutnje, muitala Doris Norbye. Ulbmil lea lágidit gollebassangilvvu juohke nuppi jagi ovddasguvlui.
Njuolggadusat
Gilvvus leat álkes njuolggadusat. Galgá ieš goaivut čievrra mearriduvvon rájá siskkobealde, ja dasto bassat daid. Lea dušše lohpi geavahit giehtafámuid. Lobálaš veahkkereaiddut maid galget leat manuála – guohkki, ruovdegák- kan, goaivu ja bassanlihtti. Oasálastit sáhttet geavahit 45 minuhta bassamii. Dasto addet duopmárat čuoggáid juohke gollegortnis dihto sturrodagas. Gortnit mat leat millimehterbeale addet ovtta čuoggá, ja nu de lassánit čuoggát dađistaga juohke millimehteris. Logi čuoggá gordni lea danin birrasii vihtta millimehtera birramihtus. Eanaš gortnit leat birrasii millimehterbeale sturrodagas.
Gilvu álgá diibmu 13.00. Vuoiti leage son gii oažžu eanemus čuoggáid. Lea maid vuoitu dasa gii bassá stuorámus gollegortni.
vikar6@avvir.no