– Eanandoallodirektoráhtta GIELISTA
Gieskat váiddii Nancy Porsanger Anti Eanandoallodirektoráhta Diehtobearráigehččui go eará olbmuid persondieđut ihte su boazodoallodieđáhussii. Direktoráhtta lea čilgen dán guoskan dušše guovtti siidaoassái, muhto dasa ii jáhke badjenisu ja nu bivdá ge eará boazodolliid dál veahkkin duođaštit dan.
Nancy Charlotte Porsanger Anti muitalii giđđat Ávvirii ahte váiddii Eanandoallodirektoráhta boazodoallodieđáhusvuogádaga Diehtobearráigehččui go ihte vierroolbmuid persovdnadieđut su boazodoallodieđáhussii. Dál lea Eanandoallodirektoráhtta vástidan Diehtobearráigehččui, muhto Porsanger oaivvilda sin leat gielistan.
Ozai lobi ášši geahčadit
Porsanger Anti ozai lobi lohkat vástádusa maid Eanandoallodirektoráhtta lei sádden Diehtobearráigehččui, ja doppe fuomášii ahte Eanandoallodirektoráhtta čuoččuha váttisvuođaid guoskan dušše guovtti siidaoassái, ovtta oanehis áigodagas.
– Eanandoallodirektoráhtta gielista go čuoččuha dan, mun dieđán váttisvuođat leat juo leamaš 2014 rájes, lohká son.
Danne čálii ge son facebook-jovkui «Samisk reindrift - veien videre» dán birra ja bivddii eará badjeolbmuid sutnje veahkkin duođaštit ahte leat vásihan seamma lágan áššiid.
Dál muitala badjel logi olbmo suinna váldán oktavuođa, ja muitalan mo sii leat bártidan seamma vuogádagain.
Beassá oaidnit earáid dieđuid
Porsanger Anti muitala son lea máŋgii ožžon nuppi olbmo sensitiiva dieđuid iežas skovvái. Sihke personnummariid, kontonummariid ja dieđuid nuppi mánáid ja guimmiid birra.
– Lea hui issoras jurddašit jus boasttu olmmoš beassá lohkat dakkár dieđuid earáid birra, ja jus boasttu olmmoš beassá lohkat dieđuid mu birra, lohká Porsanger Anti.
Čáhppes gielis
Porsanger Anti lohká ahte lea čáhppes gielis go čuoččuhit ahte dát váttisvuohta lea guoskan dušše guovtti siidaoassái, ja lea dáhpáhuvvan dušše ovtta beaivvi. Son muitala maid ahte ealáhus lea olu jagiid gáibidan bálkestit dan vuogádaga mii dál lea, ja álggahit ođđa vuogádaga mii doaibmá buot mediavuogádagain.
– Dat mii mis dál lea, doaibmá dušše Internet Exploreris, ja dat lea hui dološmállet interneahttavuogádat, dadjá Porsanger Anti. Su mielas oččošii vuogádat leat eambbo áddehahtti geavaheddjiide maid, go dat vuogádat mii dál lea ii leat nu álki go sáhtášii leat.
Váidalahtti go jáhkket direktoráhttii
– Mu mielas lea váidalahtti go Diehtobearráigeahčču jáhkká dasa maid Eanandoallodirektoráhtta čállá go duššin dahket boasttuvuođa, lohká Porsanger Anti. Son oaivvilda maiddái ahte ii oro Boazodoallohálddahusas ge diehtosihkarvuohta sajis, go leat persovnnalaš dieđut mat mannet e-poasttain mat eai leat krypterejuvvon.
– Lea balddihahtti go min boazodoallodieđáhus orru dego rabas ráigi vierrásiidda, oaivvilda Porsanger Anti.