SUOLLAGAT jođus Porsáŋggus
– Lea unohas dovdu go olmmoš ii sáhte šat guođđit iežas diŋggaid ráfis bartii, lohká Aslaksen.
Disdaga maŋŋelgaskabeaivvi lea muhtin gaikon sisa muhtin bartii Idjajávrris, mii lea gaskal Kárášjoga ja Leavnnja, Kárášjoga suohkanis. Bartaeaiggát lea dolkan dása.
Finnmárkku politiijaguovlu čállá Twitteris ahte seamma guovllus, ja vel Bissojohduoddaris, leat leamaš máŋga sisagaikuma maŋimuš áigge, ja dáhttot cavgilemiid áššis. Okta sis gii šattai vásihit ahte su bartii leat gaikon sisa ja dolvon diŋggaid, lea kárášjohkalaš Siv Anita Aslaksen. Son muitala ahte son oaččui telefuvnna muhtin bartaránnjás disdateahkeda ahte doppe lea muhtin amas biila su bartta olggobealde.
– Mun lean dieđihan politiijaide gaikuma birra.
Gaikon gievkkanláse
Aslaksen muitala maid ahte ránnjá jurddašii ahte leat go son dat suollagat jođus go lei oaidnán amas biilla su bartta olggobealde, go son lei oaidnán ahte muhtin sajis ledje gaikon bartta das ovdalaš.
De lei smiehttan lea go son luoikan bartta muhtimii, go amas biila lea, muhto lohká iežas duođaštan sutnje ahte ii leat oktiige luoikan dan, ja jearai ránnjás ii go gilleše mannat iskame bartta.
– Go mu ránnjá bođii bartta lusa, lei olgouksa rabas. Suola lei gaikon gievkkanláse ja mannan dakko sisa ja dasto fas mannan olgouksaráiggi olggos go lea geargan doppe ja vuolgán, muitala son.
Diehtá sullii maid leat suoládan
Aslaksen muitala ahte son gii gaikkui bartii lea váldán kompressora, spiikkárbissu ja eará diŋggaid.
– Mun in dieđe nu sihkkarit maid lea dolvon, go lea veaháš váttis dan diehtit. Die aŋkke leat stuorámus diŋggat maid dieđán ahte lea suoládan.
Unohas dovdu go suollagat vánddardit
Ii leat vuohččan go Siv Anita lea vásiha ahte su bartii gaikot sisa. Ovcci jagi áigi vásihii son juste dan seamma man dál lea vásihan, seamma mánus maid, geasset.
– Lea unohas dovdu go olmmoš ii sáhte šat guođđit iežaset diŋggaid ráfis bartii. Olmmoš ferte buot rádjat ja čiehkat eret go barttas eai leat olbmot.
Siv Anita lohká iežas cavgilan olbmuide ahte berrejit iskat iežaset barttaid ja diŋggaid leat go daid lihkadan ja suoládan doppe Kárášjogas ja Leavnnjas ja das vel viidásit. Son lohká diehtit ahte olbmot vudjet ja fáktejit daid guoros barttaid mat čužžot guorosin guhkit áiggi miehtá Finnmárkku, ja lohká maid diehtit máŋga dáhpáhusa mat leat geavvan daid maŋemus áiggiid.
Iskan duođaštusaid áššái
Finnmárkku politiijaguovllu operašuvdnaguovddáža operašuvdnajođiheaddji Jan Arne Pettersen duođašta sin ožžon váidaga ahte idjajávrri ja Bissojohduoddara barttaide leat gaikon suollagat sisa, ja politiijat navdet dan geavvan disdaga maŋŋelgaskabeaivvi.
– Mis leat leamašan olbmot doppe dan báikkis, iskamin buot duođaštusaid dan áššái, čilge son.
Sirdán ášši Porsáŋggu kantuvrii
Pettersen ávžžuha olbmuid cavgilit jus diehtá maidege dán ášši birra, ja jus vávjá makkárge johtolaga doppe mii ii oro áibbas riekta. Ášši lea sirdon Porsáŋggu leansmánnekantuvrra háldui. Ávvir ii leat lihkostuvvan oažžut Porsáŋggu politiijaid ságaide dán áššis.