Álttagasat dahket vahágiid miljárddaid ovddas
Finans Norge logut čájehit ahte Norggas leat maŋimuš logi jagi dáhkádusfitnodagat máksán váile 2 miljárdda ruvnno álttagasaid maŋŋel. Bajándálki lea dávjjimusat suoidnemánus ja borgemánus.
Meteorologalaš instituhtta dieđiha ahte diibmá registrerejedje 90 000 álttagasa Norggas. Gaskamearálaččat dagaha álttagas vahága mii máksá 15 000 ruvnno.
– Badjegealddasuodjalus lea hálbbes dáhkádus mii sáhttá suddjet árvobiergasiid ja dehálaš diehtoávdnasiid, muhto máŋgačuođi duháha viesus ii leat dákkár suddjen. Badjegealdda elrávdnje- ja teleneahtas sáhttá billistit TV, dihtora, galmmihanskábe, telefovnna, alárbmasystema ja eará dávviriid mat leat laktasan elrávdnjái, dadjá Nelfo elsihkarvuođa fágahoavda Bjørn Sørensen.
Sáhttá vahágahttit vaikke ii deaivva viesu
– Badjegealddasuodjalus ja ednensivabotkkon (jordfeilbryter) leat gáibiduvvon ođđa viesuin, vaikko eanas viesuin mat leat huksejuvvon ovdal 2010 váilot dákkár suodjalusat, dadjá Sørensen.
Dávvirat eai billahuva dušše dalle go álttagas deaivá viesu, muhto sáhttet maiddái dalle billahuvvat go álttagas časká. Jos bijahat badjegealddasuodjalusa, de it dárbbat ballat ahte viessu buollá, dahje ahte álttagas billista eará dávviriid.
– Badjegealddasuodjalus suddje olles el-rusttega, ja máksá sulaid 4000 ruvnno, mii ii leat eará go sulaid seamma go iežasoassi dáhkádusas, dadjá Sørensen