VUOSTTAŠ boazosápmelaš válljejuvvon ambassadevran
Guovdageainnu báikkálaš Polaris-gávpi válljii dán jagi Iŋgá Biret Márjá Triumf (26) Polaris ambassadevran. Son šaddá ge vuosttaš boazosápmelaš dán doaimmas mii maiddái lea ođas Kauto Motor fitnodahkii.
Jahkásaččat válljejuvvojit ođđa ambassadevrrat juohke suohkanis geat galget ovddastit Polaris skohtermearkka sihke sosiála mediain ja iešguđet doaluin mat lágiduvvojit skohterbirrasis. Ambassadevra galgá sosiála mediaide bidjat iežas skohtervuodjima govaid oassin mearkagálvovuovdimis. Juohke fitnodat sáhttá ohcat iežaset dán prográmmii ja sii geat orrot dan suohkanis sáhttet sáddet ohcama fitnodahkii.
Vuosttaš boazosámi ambassadevra
Gii lea ge vel buoret dákkár bargui, go dakkár gii vuodjá skohteriin
dálvemáilmmis iežas beaivválaš barggus. Dán jagi lea ge boazosámi nieida ja Boazovázzit profiila, Iŋgá Biret Márjá Triumf, válljejuvvon ambassadevran. Triumf lohká leat hui somán go su leat válljen, vaikko ii loga iežas áibbas sihkarin masa son dal lea searvan.
– In dieđe maid galggan vuordit, muhto mun govven goit juo ovdalaččas govaid maid bijan nehttii. Dál lea mus vel dakkár dohkálaš ágga manne bijan nu olu skohter- ja meahccegovaid olggos, lohká Iŋgá ja bohkosa.
Inga Biret Márjá lea beaggán earret eará lei mielde «Boazovázzi» tvráiddus, ja go neaktá «Binnabánnaža» mánáid-tv:s. Dasa lassin nammadii maid Norgga Boazosápmelaččaid Riikkasearvi su Dán jagáš nuorra boazodoallin, iežaset doaluin Tråante-ávvudemiin guovvamánus.
Sávvá fállat earenoamášvuođa
Iŋgá Biret Márjá sávvá fállat earenoamáš govaid, muhto maid čájehit ahte nieiddat gal maid birgejit skohtera alde. Dobbelii ii leat son vel jurddašan, muhto doaivu plánaid boahtit čavčča rájes go dat ođđa skohter boahtá.
– Sávan ahte mun, gii lean boazodoalus, sáhtán fállat juoidá eará go eará ambassadevrrat ja vel čájehit ahte nieiddat gal maid máhttet skohteriin vuodjit. Dasa lassin sáhtán čájehit man buorre mearka Polaris lea ja man bures dat doaibmá boazodoalus. Čakčat mun oaččun iežan ođđa skohtera, nu ahte gal de dan rájes ollen álgit eanet plánet movt mun galggan bargat. Mun logan dego Pippi láve lohkat: «Dan mun in leat dahkan ovdal, nu ahte dan mun gal sihkkarit máhtán», loahpaha Triumf.
– Áibbas ođas munnje
Mathis Oliver Pentha, gii jođiha Kauto Motor fitnodaga Guovdageainnus, muitala ahte dá lea vuosttaš jahki go son lea ohcan iežas fitnodaga mielde dán ambassadevraprográmmii.
– In mun dál dieđe vel riekta maid galggan vuordit, go dá lea áibbas ođas munnje. Iŋgá Biret Márjá šaddá dat vuosttaš ambassadevra dáppe. Go ambassadevran galgá šaddat, de dat eaktuda ahte deavdá buot gáibádusaid ja ahte lea lobálaš hommá. Ferte čuovvut njuolggadusaid ja ferte dieđusge leat skohterkoarta, muitala Pentha.
Boazobargi heive bures
Polaris Scandinavia márkanvuovdinhoavda Martin Haglev lohká ahte sii leat duhtavaččat go dál leat ožžon boazosámi nissona ambassadevran ja sin vuordámuš lea ahte das šaddá buorre boađus.
– Mii jáhkkit ahte boazobargi heive hui bures dán ambassadevrarollii. Boazobargi ferte leat gievra sihke psykalaččat ja fysalaččat, mii jáhkkit ja sávvat ahte min vuojánat sáhttet addit dan maid sii dárbbašit iežaset bargguide.
Sávvet vuolgit su mielde siidii
Haglev muitala ahte sii geahččalit dakkár olbmuid válljet geain lea buorre beaggin ja geat olu geavahit skohtera. Dat maid sii ges fállet ambassadevrraide lea earret eará ahte ožžot skohtera oastit buori haddái ja maiddái besset sin dávviriid oastit vuoliduvvon haddái.
– Mii gal jáhkkit ahte Iŋgá sáhttá addit olu positiiva vásáhusaid dan botta go lea ambassadevra. Diekkár garra barggus dárbbašit buriid vuojániid ja mii sávvat ahte mii sáhttit fállat dan maid sii dárbbašit vai árgabeaivi šattašii álkit. Iŋgá lea čeahppi sosiála mediain, earenoamážit instagrammain. Mii sávvat ahte boahtteáiggis beassá Polaris-bearaš vuolgit mielde su siidii.
Mii illudit eanet suinna oahpásnuvvat ovddasguvlui, loahpaha Martin Haglev.