DIGAŠTALLAN dán jagáš Márkomeanus
Márkomeanus lágidit digaštallamiid Sámedikki válgii dán bearjadaga. Lea Viestarmeara válgabiire njunušpolitihkkárat geat deaivvadit muitalit mo sii áigot ovddastit guovllu.
Márkomeanu stivralahttu Ellen Berit Dalbakk muitala ahte ovttasráđiid sámi aviissa Ságat journalisttain Steinar Solaasiin, lágida Márkomeannu politihkalaš digaštallama bearjadaga diibmu 11.45 festiválaguovllus. Dán jagi han leat sámediggeválggat čakčamánu 11. beaivvi.
Ovttasráđiid lágidit
– Márkomeannu lea digaštallama teknihkalaš lágideaddji, journalisttas Steinar Solaasas ges lea ovddasvástádus sisdollui ja bovdet politihkkariid, dadjá stivrralahttu Ellen Berit Dalbakk Márkomeanus ja lasiha: – Mii sávvat guossit dohppejit liibba gullat politihkkariin njuolga manne galgá justa sin jienastit.
– Hástalan evttohasaid juohkelágan fáttáin, ja erenoamážit fáttáin mat leat erenoamážit áššáigullevažžan Viestarmeara válgabiirii, dadjá Steinar Solaas.
Sii geat leat mielde digaštallamis leat Viestarmeara válgabiirre njunuševttohasat, Bargiidbellodaga Arild Pettersen Inga, Árjja evttohas Ronald Kvernmo, Ovddádusbellodaga Grethe Anita Andersen, Olgeš bellodaga Lars Filip Paulsen, Norgga Sámiid Riikkasearvvi Mikkel Eskil Mikkelsen, Sámiid Álbmot Lihtu evttohas Liv Olaug Slettli, Guovddášbellodaga Ann Guro Hansen ja Šiela evttohas Vibeke Larsen, leat buohkat bovdejuvvon searvat.
Sámevuohta ealáskan Viestterálas
Bargiidbellodaga Arild Pettersen Inga lea Viestterállasa badjeolmmoš. Son lea okta dán guovllu moaddečuođi sápmelaččain geat leat mielde Sámedikki jienastuslogus ja lohká dán válgabiirres leat olu hástalusat.
– Dáppe dán guovllus leat birrasii 4 000 olbmo geain lea sámi duogáš ja sámevuohta lea ealáskan. Mii dárbbašat ođđa giellaguovddážii nu go Várdobáiki ja Árran. Erenoamážit leat dárbu fállat sámegieloahpahusa doaresbeale guovlluid, dál lea measta veadjemeahttun oažžut dan. Čakčat lágiduvvo sámegielkurssa Ándanjárggas ja miehtá Viestterállasa leat dieđihan iežaset kursii. Lea dárbu ahte gielddain ja giellaguovddážiin lea lagas gulahallan, go dál eai dieđe gielddat makkár gelbbolašvuohta lea giellaguovddážiin ja giellaguovd- dážat eai dieđe makkár gelbbolašvuođa gielddat dárbbašit, čilge Arild Pettersen Inga. Digaštallama loahpas beassat gulastit našunála válgagiččus maid. Sámedikki presideantaevttohasat, Norgga Sámiid Riikkasearvvi Aili Keskitalo, Bargiidbellodaga Ronny Wilhelmsen ja Árjja Inger Eline Eriksen Fjellgren deaivvadit oanehis gažadanboddui.
Lávvardaga ges lágida Ávvir ja NRK Sápmi Studio Válga talkšovva ovttasráđiid, dát dáhpáhuvvá Stuorlávus diibmu 16.30.
astrid.helander@avvil.no