Dán rádjái stuorámus goddon luossa
Deanočázádagas ollu goadjimat dán geasi
Dán rádjái lea Aage Solbakkas ja John Trygve Solbakkas dat stuorámus luossa dieđihuvvon Deanučázádaga Guolástanhálddahussii.
Dán rádjái lea Aage Solbakkas ja John Trygve Solbakkas dat stuorámus luossa dieđihuvvon Deanučázádaga Guolástanhálddahussii.
Aage Solbakk ja John Trygve Solbakk leaba goddán dán rádjái stuorámus luosa dán jagi ja soai goddiba 27,5 kilosaš luosa. Solbakk-guovttes leaba firbmon njáŋggofierpmi Njuohttegoatnilis Geavgŋá vuolábeale masa luossa čáŋai.
– Dat gal lei juo stuorát áddemis ja nu lei juo sorron dohko, ii lean gaikon fierpmi. Dat lei gáddeguoras, nu ahte lei hui lahka gátti. Lei guorrasan fierbmái ja dalle de bártidii, reašká Aage Solbakk go muitala.
Albma stuorra goadjin
Son muitala sus lea dávgelágan báddi, ja jus luossa čákŋá fierbmái lahka gátti, de mieđiha njáŋggofierbmi.
– Dat lea dehálaš, muđui gal livččii dušše luddet dahje mannan čađa fierpmi. Dat gal lei albma stuorat, muhto lei juo jápmán go moai bođiime dasa. Lea vissa ihkku čákŋan ja moai iđđedis finaime oahppamin ja doppe lei dat stuorat. Albma stuorra goadjin ja lei hirbmat jorbbas, lohká Solbakk.
Cuohppa nu roavis
Son muitala luossa lei 129 sentte guhko ja dettii 27,5 kilo.
– Das lei nu rukses cuohppa ja lei somá dan goddit dieđusge. Goadjimis, mii lea viehka stuoris, lea cuohppa hui roavis, dan sáhttá suovastuhttit, spihket, muhto boraha dieđusge. Erenomážit asehis sneaidan basestit bánnos, mii gal lea hersko, muitala son ja lohká soai leaba suovastuhttán ja sálten stuoraha maid gottiiga.
Hárjánan stuorra luosaide
Soai eaba leat goassige goddán ovdal ná stuorra luosa. John Trygve lea goddán máŋgalogi jagi áigi 25 kilosačča ja Aage gottii stákkuin 22 kilosačča Vuolle-geavgŋás go lei 13-jahkásaš. Soai leaba bajásšaddan Deanogáttis ja luossabivdduin, ja nuorran soai šlivgguiga maiddái stákkuin, muhto dál dušše fierbmuba vel.
– Olmmoš lea hárjánan stuorra luosaid oaidnit, muhto mun illá dáhtton jáhkkit ahte lei čákŋan njáŋggofierbmái ja nie lahka gátti, ja ahte ii lean gaikon ii veahá ge. Lea buorre fierbmi go lea mieđihan ja dat doalai, go dat han gal lei juo stuorra áddjá. Erenomážit go beasai oaivvi, čielggi ja beastala vuoššat, dat gal lei hersko, muitala movttegis Aage Solbakk.