Ollugat dieđihit seamma luossa
Eahpesihkarvuohta Deanučázádaga Guolástanhálddahusa bivdoraporttas
Deanučázádaga Guolástanhálddahusa ráđđeaddi Narve Stubbraaten Johansen lohká sin ožžon cavgilemiid ahte bivdoraporttas leat ollugat geat leat dieđihan seamma luosa.
– Leat boahtán cavgileamit ahte bivdoraporttas leat guovttegeardásaš dieđiheamit ovtta luosas. Orru leamen ahte muhtin lea boastut ádden dieđiheami, muitala Johansen.
Isket
Maŋŋá oaggunáigodaga iská Deanučázádaga Guolástanhálddahus ahte eai leat máŋggageardásaš dieđiheamit.
– Mii čuovvolat dieđihemiid, guorahallat raporttaid ja iskat ahte eai leat máŋggageardásaš dieđiheamit, muitala Narve.
Suopmelaččat maiddái
Dán jagi bohte ođđa oaggunnjuolggadusat, ja danin leat turisttat maid oastigoahtán eambbo oaggunkoarttaid Norgga bealde.
– Ovdal oste eanaš turisttat oaggunkoarttaid Suoma bealde. Ođas dán jagi lea ahte mii oažžut dieđihemiid turisttain ja suopmelaččain maiddái, geat ostet oaggunkoarttaid Norggas. Orru leamen nu ahte lea muhtin dán joavkkus gii lea boastut ádden
dieđiheami, dadjá ráđđeaddi.
Eahpesihkarvuohta
Johansen dadjá ahte lea vissis eahpesihkarvuohta bivdoraporttas.
– Raporttas lea dieđusge vissis eahpesihkarvuohta. Geahčastin jođánit raporterenlisttu, ja oidnen ahte muhtimat ledje dieđihan seamma luosa raportii, muitala son.
Ii stuorra váttisvuohta
Son ii jáhke ahte guovttegeardásaš dieđiheapmi lea stuorra váttisvuohta, go sii han isket dieđihemiid ja váldet eret luosa mii lea guktii dieđihuvvon.
– In jáhke máŋggageardásaš dieđiheamis lea stuorra váikkuhus
raportii. Dat gal manná dan eahpesihkarvuođa vuollai mii juo lea vuogádagas ja raporttas. Váikkuhus máŋggageardásaš dieđiheamis lea ahte mis šaddá eambbo bargu go lohkat raportta, dadjá Johansen.
Eastadit
Johansen jáhkká ahte sáhtášii eastadit dákkár máŋggageardásaš dieđihemiid jus oaggut ožžot eambbo dieđuid dieđiheami birra go ostet oaggunkoarttaid.
– Šattai hui hušša dán jagi, go ođđa oaggunnjuolggadusat eai lean vel áibbas gárvásat ovdal go oaggunáigodat álggii, nu ahte eat ožžon diehtojuohkima raportta birra johtui. Mihttun eará jagiide ferte leat ahte oažžut diehtojuohkima
oagguide ovdal oaggunáigodaga, dadjá son.
Divat jus ii dieđit
Dat gii ii leat dieđihan ahte lea goddán luosa maŋŋá áigodaga, oažžu bálvalusdivada boahtte jahkái go áigu oastit oaggunkoartta. Vuosttaš jagi lea 300 ruvdnosaš divat. Jus eai leat goddán luosa, de fertejit liikká dieđihit ahte eai leat goddán.
– Dagaha eahpesihkarvuođa go eai dieđit leat go goddán guoli vai eai. Mađi eambbosat geat dieđihit bivdoraporii, dađi buoret lea geavahit statistihka ja árvvoštallanraportta, loahpaha Narve.