Eurohpá nuorat čoahkkanan meahcástallat
Eurohpá nuorat leat čoahkkanan Lákkovuonbahtii MEAHCÁSTALLAT
48 nuora leat čoahkkanan Lákkovuonbahtii oahppat sámi kultuvrra, boazodoalu, meahcástallama ja kulturerohusaid birra. Ulbmil nuoraidlonohallamiin lea čalmmustuhttit álgoálbmogiid ja fillet nuoraid birget teknologiija haga ja álgit eambbo olgun suohtastallat.
Borgemánu 1.beaivvi gitta borgemánu 10.beaivai galget nuorat gaskal 16- ja 25-jagi orrut Lákkovuonbađas, Altafjord Campingas. Nuorat bohtet Vuolleeatnamis, Luxembourgas, Duiskkas, Makedonias, Kroátias ja Norggas. Sii galget searvat «Lets do it outside» nuoraidlonohallamii. Dan nuoraidlonohallama leat Aktiv Ungdom ja Eramus+ ruhtadan. Natur Kultur Prošeaktakoordináhtor Gabriella Jurisic Ottesen lea hirbmat movttet ja ilus go nuoraidlonohallan galgá leat Lákkovuonbađas, su ruovttubáikis.
«Lets do it outside»
Nuoraidlonohallamis galget nuorat beassat meahcástallat ja digaštallat sin guovllu minoritehtaid birra. Nuorat besset maid Lávre Johan Eira mielde vuolgit ealu lusa ja oaidnit movt doppe lea ja maid doppe barget boazosámit. Nuorat galget maid vázzit guhkibuš mátkkiid, oaggut, dolastallat, idjadit meahcis ja eará olgobargguid bargat. Nuoraidlonohallamii boahtá earenamaš guossi borgemánu 8. beaivvi, Norgga Eu-ministtar Frank Bakke Jensen. Son galgá guldalit nuoraid oainnuid ja digaštallat singuin.
Jurdda buollái olgoriikkas
Ottesen muitala son lea mielde organisašuvnnas Natur Kultur. Sii leat guhtta jagi mátkkoštan iešguđet guovlluin ja doallan bargobájiid ja nuoraidlonohallamiid. Lákkovuonbađa nuoraidlonohallan lea nubbi oassi dán jagáš nuoraidlonohallamis. Vuosttaš oassi lei Duiskkas, ja doppe leigga Lávre Johan Eira ja Aigin Juhls mielde.
– Jurdda bođii go oidnen movt nuorat liikojit dakkár doaluide. Sii besset oahpásnuvvat eará nuoraiguin geat bohtet eret eará guovlluin ja kultuvrrain, ja nu mun jurddašin livččii hui somá čájehit sidjiide Norgga kultuvrra ja Sámi kultuvrra. Nuorat leat maid čájehan hui olu beroštumi oahppat eará minoritehtaid ja álgoálbmogiid birra, muitala Ottesen.
Nuorat ovddidit servvodaga
Ottesen muitala ahte nuorat lávejit nu servvodatáŋgirin šaddat go leat leamašan dakkár doaluin gos besset digaštallat ja oahpásnuvvat eará kultuvrraiguin.
– Nuorat áŋgirit dohppejit
dakkár vejolašvuođaid, ja nu sii ohppet movt sii sáhttet váikkuhit servvodaga ja leat reaidun servvodahkii. Sii nu movttiidahttojit bargat servvodatáššuiguin ja lea nu somá oaidnit movt sin mokta dušše báitá go leat digaštallame fárrolaga. Sii lávejit nu hutkagoahtit maid galget bargat go ollejit ruoktot ja movt sii sáhttet váikkuhit servvodaga buoret guvlui. Nuorat han leat min boahtteáigi, muitala Ottesen.
Somás hástalusat
– Jáhkán nuorat ožžot olu somás hástalusaid daid beivviid go leat Lákkovuonbađas. Sii besset vuosttažettiin leat hui olu olgun ja galget birget ođđa áigásaš teknologiija haga, mii soaitá leat hui amas eanas nuoraide geat boh- tet. Jáhkán šaddá hui somá nuoraide idjadit olgun, muhte jurdda lea dan hástalusa maid dahkat suohtasin. Muđui jahkán kulturerohusat sáhttet šaddat somás hástalussan. Nuorat besset vásihit giellaerohusaid, ja besset hupmat movt sis lea skuvllas ja muđui sin ruovttu baikis. Dálki maid diehtolassi sáhttá šaddat hástalussan, muhte dálki ii galgga min hehtet suohtastallamis, muitala Ottesen.
Šaldehuksen
– Mun saván mii Lákkovuonbađas ja reasta máilmmis šaddet eambbo sáhkkit eará kultuvrraide, ja ahte mii fas muitát ahte mis leat guokte kultuvrra Lákkovuonbađas, sámi kultuvra ja Norgga kultuvra, mii lea hui earenoamáš. Sávvamis sihke nuorat, geat servet «Lets do it outside» doaluide ja earát, geat besset humadit nuoraiguin, besset oahppat eanet máilmmi iešguđet kultuvrraid birra. Jurdda lea ahte nuorat huksejit šalddi buot kultuvrraid gaskka mat deaivvadit dán vahkku Lákkovuonbađas. Dasa lassin mun saván dát nuoraidlonohallan veahkeha min ja eará organisašuvnnaid hukset oktavuođafierpmádagaid gaskkaneaset, loahpaha Ottesen.