Čájeheaba vahkkosaččat vuoidama 2000 olbmui
Interneahtas gávdnojit dán áiggi olu vuoidanvideot maid bokte oahppá movt sáhttá vuoidat ámadaju. Dás beasat lohkat guoktása birra geat leaba oahppan vuoidat dan vuogi mielde ja dál soai oahpaheaba earáid. Soai čájeheaba vahkkosaččat iežaska vuoidama 2000 olbmui geat beroštit vuoidamis.
Naja Ristiina Fors (22,) geas lea sihke Sápmái ja Ruonáeatnamii gullevašvuohta, muitala ahte son geavaha olu áiggi vuoidamii, muhto dat ii mearkkaš ahte son vuoidá beaivválaččat. Eanas áiggi son vuoidá go galgá juoidá erenoamáža bargat dahje čájehit earáide neahta bokte iežas vuoidanmáhtu, nu go son dahká earret eará Snapchat-geavaheaddjis man doaimmaha ovttas eará nieiddaiguin, mas leat sullii 2000 geahčči. Dál son áiggošii eanet vuoidanfilmmaid buvttadit vai beassá olahit eambbogiid.
Ii lean nu fiinnis gal álggos
Naja Ristiina muitala ahte son lea guhká liikon vuoidat ja geahččaladdat ođđa vuoidanvugiid, muhto go álggos álggii, de son ii láven geavahit nu olu vuoidasiid.
– Mun lávejin álggos geavahit dušše mascara ja lávejin veahá baksamiid vuoidat, in mun vuoidan ámadaju gal nu olu. Ii lean nu fiinnis gal álggos, lohká son.
Šattai beroštupmin
Moadde jagi dassái son eanet geahččaladdagođii ja loktanii ge dađi mielde sus beroštupmi dasa.
– Mus loktanii stuora beroštupmi go fuobmájin man somá dat lea geahččaladdat. Lei hui somá go álgen oahppat eanet ja makkár erohus šattai go ledjen vuoidan. Dat mii maid lea hui buorre, lea ahte dan sáhttá bassat eret, ii leat go gaskaboddosaš hápmi, muitala Naja.
– Manne jur nie ges vuiden
Naja muittaša go álggos álggii, de dagai son máŋga vuoidanmeattáhusa ja earret eará lei sus áibbas boasttu ivdni liikevuoidasis. Dat lea leamaš proseassa man čađa olu nuorat leat mannan, gávdnat iežas stiilla ja mii heive su hápmái.
– Mun lávejin geavahit liikevuoidasa mii lei menddo seavdnjat munnje, nu ahte váccašin márkanis ámadajuin mas lei áibbas earálágan ivdni go mu iežan ivdni. Dat gal ii lean nu čáppat, muhto die lea dakkár meattáhus man lea hui dábálaš dahkat go álggos álgá. Nubbi lei dat ges ahte ledjen hui ártegit vuoidan čalbmegulmmiid. Vuoi hearrán, go dál geahčan daid govaid, de jurddašan manne jur nie ges vuiden, boagusta Naja ja lohká ahte eanas nuorat dán áigge eai dárbbat šat mannat dien seamma proseassa čađa, go ohppet buot maid dárbbašit neahtas.
Luondu attii inspirašuvnna
Naja lohká ahte son láve muhtumin vuoidat hui eará ládje go dábálaččat ja geahččala iežas kreatiivvalaš beali geavahit dan proseassas. Dat lea ge okta su čehppodagain, ráhkadit hámi mii lea áibbas earálágan go dábálaš hápmi. Muhtumin son maid váldá inspirašuvnna iežas nuppi beroštumis, mii lea meahcástallan.
– Mun liikon meahcástallat ja muhtumin válddán inspirašuvnna ivnniin maid doppe oainnán. Oktii ledjen ráhkadan eananlaš hámi mas ledje ruškeslágan ivnnit, galggai sulastahttit eatnama ivnniid.
Heiveha vuoidasa gákteivdnái
Naja muitala ahte go son čiŋada gávttiin, de son ii gal unnit vuoidasa geavat dan dihte. Son baicce heiveha ivnniid gákteivdnái.
– Mun soaittán veahá earálágan go earát, in mudde gal vuoidama go čiŋadan gávttiin. Mun láven baicce heivehit ivnniid gáktái, ovdamearkka dihte baksamiid vuoiddan seamma ivdnin go gávttis lea dan beaivvi. Jus lea čuvgesrukses gákti, de láven bidjat čuvgesrukses vuoidasa baksamiidda, muitala son.
Rahpá ságastallamiid amas olbmuiguin
Son muitala ahte muhtimiidda lea ain amas ná vuoidat, muhto eatnasat čájehit beroštumi ja rámidit su vuoidanmáhtu.
– Muhtumin bohtet muinna háleštit olbmot geaid in oba dovdda ge, dušše dan dihte go lean nu erenoamáš vugiin vuoidan. Dat vuoidan sáhttá muhtumin oččodit ságastallamiid johtui olbmuiguin geaiguin muđui in livčče oahpásnuvvan. Leat máŋgasa boahtán mu lusa muitalit ahte sin mielas ledjen nu fiidnát vuoidan, mii lea hui somá, muitala son ja čilge ahte son ii láve álo gal mannat olbmuid sisa jus lea vuoidan hui ekstremat. Dan son baicce govve ja bidjala nehttii.
Ii vuoidda beaivválaččat
Vaikko son olu govve go lea vuoidan ámadaju ja geavaha olu áiggi dan beroštupmái, de son ii vuoidda beaivválaččat ámadaju.
– Ii leat veaháge nu ahte vuoiddan juohke beaivvi, mun in oba geavat ge vuoidasiid beaivválaččat. Liikái lea hui buorre go ii leat liikkis vuoiddas juohke beaivvi. Mun in beroš maid olbmot jurddašit makkár mun lean olggosoaidnit jus in leat vuoidan. Dá lean mun ja nu dat beare lea, nu mun láven
jurddašit. Lea dehálaš ahte sáhttá maid vuoidasa haga mannat olggos viesus. Dan sávan ahte nuorra nieiddat maid jurddašit, eai ge dovdda dan ahte sii fertejit álo vuoidat ámadaju. Láven lohkat olbmuide ahte sii leat čábbát vaikko mo de livčče, lohká son.
Vuoidat nu ropmin go oba vejolaš ge
Naja muitala ahte Halloween lea su favorihttaáigodat go de son láve vuoidat sihke iežas ja su olbmáid Halloween riegádanbeaifestii man son láve doallat. De lea ge áibbas nuppe ládje go dábálaččat, de sáhttá ges vuoidat iežas nu ropmin go oba vejolaš ge.
– Láve nu somá Halloweena. De mii vuoidat iežamet nu ropmin go oba vejolaš ge, ja de beasan geahččaladdat eará teknihkaid go dábálaččat, nu go háviid ráhkadit ja rievdadahttit ámadaju áibbas, muitala Naja geas lávejit oalle olu vuoidamat dan beaivvi go galgá ollet sihke iežas ja olbmáid vuoidat.
2000 geahčči ovddabealde vuoidaba
Naja Ristiinna Fors ja Renate Andersen Lindseth doaimmaheaba ovttas golmmain eará nieiddain Snapchat-geavaheaddji mas leat dal sullii 2000 geahčči. Doppe sii vahkkosaččat čájehit iežaset vuoidanmáhtu, vuoidasiid, liikedivššu ja nu ain viidásit.
Dego bargobeaivi
Ulbmil dáinna lea čájehit viidát movt sii vuidet, oahpahit ja movttiidahttit earáid geain lea vuoidanberoštupmi. Naja lohká maid sávvat oahppat earáin seammás go oahpaha earáid.
– Dat beaivi go mun galggan doaimmahit dan Snapchata lea dego bargobeaivi. Mun ferten olles beaivvi leat aktiiva doppe ja čájehit olu maid mun barggan dan beaivvi. Olbmot lávejit evttohit movt galggan vuoidat dan beaivvi, ja mun láven de čájehit sidjiide movt vuoiddan, movt mun basan ámadaju ja olu diekkáriid. Olles beaivi láve mannat dasa, loahpaha Naja. Nubbi nieida gii maid lea oahppan interneahta bokte vuoidama lea Renate Andersen Lindseth (19), Kárášjogas eret. Son čájeha sihke iežas Instagramja snap-geavaheaddjis iežas vuoidanmáhtu. Su niehku lea ahte boahtá vel eanet oidnosii ja ahte beassá vel eambbogiidda čájehit iežas máhtu.
Fitnodagat váldet oktavuođa
Renate muitala ahte son lea dán rádjái ožžon olu responssa ja maiddái leat vuoidanfitnodagat sutnje sádden buktagiid.
– Leat oallugat geat čállet munnje go háliidit vuoidanrávvagiid mus, muhto maiddái iešguđet fitnodagat leat muinna váldán oktavuođa go háliidit ahte galggan čalmmustahttit sin buktagiid. Moaddása leat sádden munnje vuoidasiid ja vuoidangušttaid maid mun de lean čájehan iežan videoin, muitala Lindseth.
Olu áigi manná dasa
Renate lohká ahte son ii vuoidda juohke beaivvi, muhto mieđiha gal ahte sus manná goitge olu áigi dasa.
– Mus manná dieđusge olu áigi vuoidamii, go galggan min oktasaš snap-geavaheaddjis vuoidat, muhto maiddái geavaheaddjekonttuide bidjat videoid, lohká son.
Niehkoovttasbargu
Su niehku livččii ahte su favorihttavuoidanfitnodat fuomáša su ja ahte beasašii singuin ovttasbargat, muhto mieđiha ahte dan sáhttá leat váttis.
– Livččii somá ovttasbargat iežan favorihttavuoidanfitnodagain «Anastasia Beverly Hills», sávan sii fuobmájit mu. Sáhttá gal leat váttis šaddat dovddusin vuoidanmáilmmis go leat nu oallugat geat dahket dan. Ferte measta dovdat olbmuid vai galgá ollet guhkas, lohká son.
Njálgát sáhttet addit inspirašuvnna
Renate muitala ahte buot mii su birrasis lea sáhttá buktit sutnje inspirašuvnna ja ahte son liiko olu ivnniid geavahit.
– Mun liikon geavahit hui olu ivnniid, ja jáhkán dan sáhttit dagahan ahte oallugat leat čuovvugoahtán mu geavaheaddji. Muhtumin sáhtán oaidnit gova dahje njálgá, ja de oaččun idea mainna barggan viidásit. Oktii ožžon idea Lollipop lákcajieŋas ja vuiden iežan dakkár ivnniiguin mat das ledje, muitala nuorra nieida.
Vuoidamis eai leat njuolggadusat
Son háliida deattuhit ahte vuoidan galgá leat somá ja ahte das eai leat njuolggadusat.
– Háliidan ahte nuorat galget jurddašit ahte vuoidamis eai leat njuolggadusat ja mađi eambbo hárjehalat, dađi čeahpibun šaddá. Lea maid dehálaš ahte vuoidan dušše lea suohttasa dihte, ii ge leat dakkár man lea bággu dahkat, loahpaha Renate Andersen Lindseth.