Dehálaš dieđihit luosaid
Dán jagi lea Deanočázádagas leamaš oalle mihá heajos diehtojuohkin mot goddon luosaid galgá dieđihit. Dan sáhttá juo vihkkut luossadieđihemiin mat dán rádjái leat dahkkon, go muhtun luosaid leat dieđihan máŋgga geardde sisa. Namalassii ovtta ja seamma luossa dieđihan guovtte háve sisa. Dat orru dáhpáhuvvon dalle go guovttis leaba fárrolaga fatnasis goddán luosa, ahte goappašagat leaba dasto dieđihan luosa goddán. Deanučázádaga Guolástanhálddahusa ráđđeaddi, Narve Stubbraaten Johansen, muitala ge otná Ávviris, iežaset ožžon cavgilemiid ahte bivdoraporttas leat máŋggas geat leat dieđihan seamma luosa.
Dán geasi bohte ođđa oaggunnjuolggadusat man geažil leat turisttat maid oastigoahtán eambbo oaggunkoarttaid Norgga bealde. Ođas dán jagi lea ge ahte Deanučázádaga Guolástanhálddahus oažžu bivdodieđihemiid suopmelaččain maiddái, geat ostet oaggunkoarttaid Norggas. Narve Stubbraaten Johansen dadjá ge muhtimat dán joavkkus orrot boastut ádden mot galgá dieđihit. Dieđus ferte diehtojuohkima buoridit boahtte geassái, ja dan gal dieđus šaddá. Ferte oainnát muitit ahte ođđa njuolggadusat bohte dán jagi hui maŋŋit fápmui, ja dasa lassin lea leamaš ollu riedja dan birra. Liikká jáhkkit DG nagodit čorget eret luosaid mat leat guovtte háve dieđihuvvon, vai bivdoraporta šaddá nu riekta go vejolaš. Ii ge dat dáidde ge stuorámus hástalus luosaid dieđiheamis, muhto baicce dat ahte bivdit dieđihit rievttes loguid. Lea ge dehálaš ahte okta ge ii dieđit eambbo dahje unnit luosaid go duohtavuođas leat goddán. Sámiid gaskkas ii leat amas ahte ii galgga almmuhit man ollu lea goddán luosaid, ii ge vel dan ge gos. Liikká dáidá dehálaš, ahte buohkat dieđihit rievttes loguid, go dat maid álkidahttá luosabivddu hálddašeami.
Soaitá dárbu ahte DG geahčada doaibmá go sin dieđihanvuogádat doarvái bures sámi vieruid mielde.
Vaikke ii leat sápmelaččas jur dáhpin huikkádit miehtá máilmmi gos ja maid ja man ollu lea goddán bivddus, de aŋkke ávžžuhat buohkaid dieđihit luosaid sisa. Erenoamážit go dutkiid dieđuid mielde leat Deanočázádaga luossanálit rašes dilis. Dat goit lea áibbas čielggas ahte luossabivddu ferte hálddašuvvot jierpmálaččat jus luossanálit galget seailut boahtteáigái. Dasa eahpitkeahttá leat dehálaččat luossabivdoraporttat, ii dušše Deanočázádahkii, muhto buot luossajogaide. Aŋkke lea dan láhkái ahte Deanočázádat dáidá leat vel áidna luossajohka gos sámi árbevieruid mielde lea lohpi bivdit luosaid. Soaitá dárbu ahte DG geahčada doaibmá go sin dieđihanvuogádat doarvái bures sámi vieruid mielde. Dasto geahččat lea go dárbu rievdadit dieđihanvuogádaga mii heive sámiid vieruide buorebut, ahte ii galgga almmuhit buohkaide maid lea goddán, ja guhkkin eret gokko ja gos.