Murmánskka olgoriikastašuvdna unniduvvo
Mátta-várjjaga gieldda sátnejođiheaddji lea fuolastuvvan go Norgga olgoriikastašuvdna Murmánskkas unniduvvo.
– Mun lean fuolastuvvan. Mun oaččun signálaid olbmuin Murmánskkas geat oidnet ahte Norga unnida doaimma doppe, earret eará uhcidit báikkálaš bargiid logu, ja visumossodat lea sirdon Moskvai, dadjá Mátta-várjjaga sátnejođiheaddji Rune Rafaelsen (Bargiidbellodat) NRK:I.
Norgga generálakonsuláhtas Murmánskkas leat leamaš badjel 30 bargi, muhto maŋimuš jagiid lea sihke diplomáhtaid ja báikkálaš bargiid lohku uhciduvvon. Čakčat báhcet dušše 17 bargi dan kantuvrii. Generálakonsuláhtas lea ovddasvástádus Barents-ovttasbargui, ja maiddái oktasaš guolástanhálddahussii ja birasgáhttemii.
– Mun dajašin ahte Murmánskka lea Norgga deháleamos gozihanbáiki. Dan bokte leat Norggas stuora hástalusat moalkás ránnjá oktavuođain. Dalle lea dehálaš ahte lea gievrras, našunála sadji gávdnamis Ruoššas. Mun sávan ahte das lea sáhka máhtu váilevašvuođas, ja ahte dan sáhttá njulget nu johtilit go vejolaš. Norggas lea stuora beroštupmi ovddidit buori ovttasbarggu, ja de lea generálakonsuláhtas Murmánskkas stuora mearkkašupmi, deattuha Rafaelsen.
Diibmá juhke eanet go 10 000 visuma Murmánskka kantuvrras. Mannan vahkus dieđihii generálakonsuláhta Facebookas ahte bargogoddi Moskva ambassádas stuorru rievdadusaid oktavuođas. Dieđihuvvo maiddái ahte deháleamos rievdadusat visumohcciide Murmánskkas ja Arkhangelskas ovddos guvlui šaddá ahte buot ohcamušat galget dolvojuvvot visumguovddážiidda. Visumossodat Murmánskkas joatká meannudit rádjeássiidduođaštus ohcamušaid, olbmuide geat orrot rájáid lahka.