Válljejuvvui ŠILJU BUOREMUS ČIEKČIN
Dán jagáš Norway cup lea nuorra kárášjohkalačča Nils Mikkel Utsi mielas leamaš hirbmat somá. Son lea beassan čiekčat spáppa, ožžon bálkkašumi, ja dasa lassin vel geahčadit nieiddaid.
Mánnodaga Norway cupas válljejuvvui Nils Mikkel Utsi šilju buoremus čiekčin Tv-čiekčamis, ja lei čiekčanšilju jury mii dan mearridii.
Somás dovdu
Utsi muitala ahte lea hui somá go su leat válljen čiekčanšilju buoremus čiekčin. Son lei iežas mielas čiekčan bures, muhto aŋkke ii lean vuordán dán.
– Lea hui somá go ieš dovdá ahte čiekčá bures, ja go earát maid oaivvildit dan. Dat gal lea hirbmat somás dovdu, muitala Utsi.
Vuoitán ja vuoittáhallan
Utsi muitala ahte dán jagáš Norway cupas lea sin joavku oktii vuoitán, oktii vuoittáhallan, ja oktii šattai dássečiekčan.
– Mu mielas lea mannan bures, vaikko in leat duđavaš go vuoittáhalaimet, muhto lean duđavaš mo ieš čikčen ja iežan olahusain. Dalle go mii vuoittáhalaimet, ledje mu mielas dan nuppi joavkkus dušše lihkkomoalat, dadjá Utsi.
Utsi mielas lea joavkkuin alla dássi, ja muitala ahte joavku man vuostá čikče vuosttaš čiekčat nagodedje dahket guokte moala maŋimuš njealji minuhtas.
– Dáppe gal leat buorit čiekčit, čeahpit juohke posišuvnnas, dadjá Utsi.
Mihttu
Utsi joavku ii beassan A-loahppačiekčamiidda, vaikko sin joavkku mihttu lea leamaš beassat dohko. Ii lean šat sin duohken besse go dasa, muhto ovtta eará joavkku.
– Lei ovtta eará joavkku duohken, jos sii livčče vuoittáhallan ovtta čiekčama, de livččiimet beassan A-loahppačiekčamiidda, muitala Utsi.
Vaikko joavkku ii beassan A-loahppačiekčamiidda, de leat sii mielde B-loahppačiekčamiin.
Suohttaseamos
Utsi muitala ahte lea leamaš somás vásáhus searvat Norway cupii dán jagi, ja vaikko su mielas lea leamaš hirbmat somá čiekčat spáppa, de lea juoga mátkkis leamaš vel suohttasut.
– Suohttaseamos dáppe gal lea leamaš geahččat nieiddaid, ja dieđusge čiekčat spáppa, muitala Utsi.