Niehkobarggus paradiijásis
Julevsámi nieida Frida Susann Urheim (24) galgá oktiibuot vihtta mánu bargat mátkkoštanláidesteaddjin Skiathos sullos, Greikkas. Sutnje lea dassážii leamaš dego paradiijásis bargat ja lohká iežas dovdat dego ruovttus greikkalaččaid luhtte.
Frida Susann Urheim, gii lea Divttasvuonas eret, muitala ahte son háliidii geahččalit juoidá man ii leat ovdal bargan, dasa lassin go háliidii geahččalit olgoriikkas orrut. Dát niegut dolvo su gitta unna sulložii Skiathosii mii lea Greikkas gos son dal bargá Ving nammasaš mátkefitnodagas. Su bargu lea earret eará mátkkošteddjiid láidestit go bohtet Skiathosii.
– Mii han leat paradiijásis
Urheim muitala ahte son bargá guhkes beivviid, gávccis iđđedis gávcci rádjái eahkedii. Dábálaš bargobeaivi sutnje lea finadit mátkkošteddjiid hoteallain, vuostái váldit sin go seivot girdišilljui, láidestit mátkkiid ja muđui vástidit gažaldagaid mat bohtet mátkkošteddjiin.
– Dat lea olu bargu, muhto friddjabeivviid mii vuolgit daidda čáppa sáttogáttiide mat leat dáppe dahje meara ala. Mii han leat paradiijásis dáppe, muitala son.
Veahkahallá eaktodáhtolaččat
Son lasiha ahte son láve maid muhtomin veahkahallat beatnatruovttus gos leat olu beatnagat ruovttuid haga.
– Lea nu somá leat daid beatnagiid luhtte, golahallat áiggi daid unna vielpážiiguin stoahkat ja oaidnit daid movttegis beatnagiid, muitala Frida.
Oahppan olu
Frida lohká iežas oahppan olu dan rájes go álggii bargui Skiathosii, sihke bargooktavuođas ja persovnnalaš dásis.
– Lean oahppan olu sihke bargooktavuođas, nu go movt doaimmahit dákkár barggu. Lean oahppan Greikka ja sin kultuvrra birra, muhto maiddái iežan birra go dát han lea oalle earenoamáš bargu, lohká son.
Kalimera lea buorre iđit
Dál, go son lea orron ja bargan Greikkas miessemánu rájes, de lea maid oahppan veahá greikkagiela.
– Lean oahppan daid dábálaš
sániid. Kalimera lea buorre iđit ja buorre eahket ges kalispera, muitala Frida.
Geassi maid ii boađe goasse vajálduhttit
Sutnje lea dat buoremus leamaš oahpásnuvvat olu olbmuiguin, oahppat olu earenoamáš áššiid ja go beassá sihke bargat ja orrut lieggariikkas.
– Mus lea leamaš dássážii oba somás geassi man in boađe goasse vajálduhttit. Mun gal ávžžuhan dakkár barggu sidjiide geat háliidit bálvalusealáhusas geahččalit bargat ja seammás bargat earenoamáš barggu olgoriikkas. Jus bargá bures ja loaktá barggus, de lea vejolaš ohcat barggu guhkiduvvot ja maiddái eará báikkiide, muitala son.
Muittuhit davvinorgalaččaid
Báhkkasii ja bargovuohkái son lea dál hárjánan ja lea dovdagoahtán iežas ruovttus Skiathosis.
– Dovddan iežan hui ruovttus dáppe, olbmot dáppe leat hui rahpasat, smáđáhkkásat ja eai ge doama nu bearehaga, muittuhit mu davvi-norgalaččaid, muitala Urheim.
Bivnnuhis suolu
Frida muitala ahte Skiathos suolu
lea bivnnuhis luopmobáiki olu turisttaide ja sullos leat olles 66 sáttogátti.
– Lalaria dat buot fiidnámus ja earenoamáš sáttogáddi dáppe, dohko vulget olu olbmot. Dán sullos filbmejedje maid oasi filmmas «Mamma Mia», muitala son.
Čakčat fas ruoktot
Čakčamánu loahpas son máhccá fas ruoktot, ja go jearan masa son eanemus illuda, de son vástida jođánit.
– Illudan buot eanemus deaivvadit buohkaiguin ruovttus ja leat iežan bearraša lahka, loahpaha son.