– Njuorjju lea dego gumpe
Mearraluossabivdi Reidar Larsen lohká njuorjju leat hástalussan vuotnabivdiide go njuorjju gaikkoda firpmiid ja son oaivvilda njuorjju lea dego gumpe mearas.
Reidar Larsen bivdá oarjjabeale Deanodaga ja son lea maiddái vásihan ahte njuorjju bivdá su firpmiin.
– Dat váldet luosa fierpmis ja gaikot firpmiid. Mii oaidnit ahte njuorjju lea laskan. Go ii oktage daid bivdde, de gal dieđusge lasket, lohká vuotnabivdi Reidar Larsen.
Dego gumpe
Son muitala bivdit geat bivdet lahka Deanunjálmmi leat eanet giksašuvvan njurjo dihte go son, muhto maiddái su firpmiid lea njuorjju ráigan.
– Njuorjju lea šaddan giksin, vuos váldá luosaid firpmiin ja várra baldá vel eret guliid. Njuorjju han lea mearas dego gumpe, seamma ládje go gumpe lea duoddaris, de njuorjju fas mearas gumpe. Dat oaguha, dadjá son.
Várrogas bivdi
Son čilge njuorjju diehtá ahte luossa gorgŋe johkii ja son oaivvilda danne orrot njurjot das Deanunjálmmis, ja leat beassan laskat maŋŋá go ráfáidahttui njuorjju.
– Njuorjju lea hui várrogas bivdi, dan ii leat beare oaidnit ahte váldá luosaid, ja dat mii báhcá lea ráigi fierbmái. Man olu leat njurjot ii sáhte ii oktage diehtit, muhtin dutkit lohket dat eai leat olu ja sii geat johtet meara alde lohket ahte lea olu njuorjju, lohká Larsen.