Boarrásamos ja nuoramus BÁHČČI FINÁLII
Kárášjoga báhčinsearvvi lahtut, Egil Olli V65 luohkás, ja Benedicte Guttorm juniorluohkás, beassaba guktot báhčit loahppagilvvu dán bearjadaga Landskytterstevnet 2017 báhčimiin Førdes.
Norga Báhčingilvu «Landskytterstevnet 2017» lea lágiduvvon jahkásaččat, dál 118. geardde, ja dán jagi lágiduvvo dat njealját geardde Førdes, suoidnemánu 28. beaivvis borgemánu njealját beaivái.
Báhččit muitalit lea arván olu Førde guovllus. Kárášjoga báhčinsearvvi lahtut, Egil Olli V65 luohkás ja Benedicte Guttorm juniorluohkás, leaba guktot báhčán nu bures ahte beassaba fealtabáhčinfinálii bearjadaga.
Báhčiba bures
Fealtabáhčimis deaivvai Egil Olli buot 30 láttain duolbu ja 21 láttain deaivvai siskkit rieggá. Benedicte Guttorm ges deaivvai 29 láttain duolbu ja 12 luođain deaivvai siskkit rieggá ja okta luođđa manai olggobeale duolbu.
– Mis leat dáppe nuorat geat báhčet hui bures. Leat olu báhččit dáppe. Somá, erenoamážit go bures manná. In leat áibbas duđavaš iežan báhčimiin go livččen sáhttán deaivat eambbo luođaiguin siskkit rieggá sisa, lohká Kárášjoga báhčinsearvvi lahttu, Nordlys valáštallansearvvi jođiheaddji ja Sámedikki ovddeš presideanta, Egil Olli.
– Fealtabáhčimis lei váddásamos čohkkát albma láhkai čippebeliid go báhčinšillju lea vuostálagas. Deiven guđain láttain viđa geardde ovtta duolbu. Livččen háliidan báhčit 30, in ge 29, go dárbbaša 30 jus háliida vuoitit, lohká 17-jahkásaš Benedicte Guttorm juniorluohkás.
Odne fealtabáhčinfinálas báhčá Egil Olli tiibmu 08:55, Kurt Maurstad tiibmu 09:00 ja Benedikte Guttorm tiibmu 15:40. Guovdageaidnolaš Adam K. Haetta báhčá tiibmu 9:50. Deanu báhčinsearvvi nuorra Camilla Mudenia báhčá tiibmu 09:50 ja Tom Eirik Malin tiibmu 15:50.
Garra gilvu
Egil Olli gii liiko gilvvohallat, deattuha ahte báhčinvaláštallamis galgá olmmoš leat áibbas lotkat vai deaivá.
– Mun lean áibbas lotkat. Váibmu galgá jođánit ráfut. Dan lean oahppan go nuorran serven čuoiganbáhčimii. Jus dan ii daga, de ii deaivva maidege. Lea seamma teknihka dál ge. Leamaš ávki sihkkelastit ja lean buori vuoimmis, čilge Egil Olli.
Muhto dákkár stuorra báhčingilvvus lea su mielas váttis leat áibbas lotkadin. Son lohká jus áigu beassat buoremusaid searvái, de ferte buot láttaiguin deaivat duolbu. Muitala V65 luohkás lea badjel 300 báhčči ja nu mo lea ádden, de lea t49 báhčči geat besset fealtabáhčinfinálii.
Garra biegga mii fáhkka loaččihii
Oktiibuot leat 4 513 báhčči miehtá riikka dieđihan iežaset báhčimiidda lágideaddjái, Førde báhčinsearvái. Dáid báhččiid searvvis leat Kárášjoga báhčinsearvvi lahtut Egil Olli, Thorvald G, Balto, Benedicte Guttorm, Kurt Maurstad, Ragnhild Maurstad. Deanu báhčinsearvvis lea ges Gunnar Kjellmo, Sáve Malin, Tom Eirik Malin, Camilla Mudenia ja Jørn Arve Vedhugnes. Guovdageainnu báhčinsearvvi ovddastit Ole Kristian Aho, Adam Klemet Haetta ja Liv Eli Holmestrand.
– In leat duhtavaš, in eisege, Mun láven bivdofealtta báhčit, ii ge dán fealtabáhčima mas lea jorba-, golbma- ja njealječiegat duolbážat, bivdofealttas leat elliid govat. Dán fealtabáhčimis galggai maid báhčit iešguđet gaskkaid, nu go 280 mehtera, 220 mehtera ja nu ain, čilge Liv Eli Holmestrand. Fealtabáhčima boađus lei 18/7. Lohká molsašuddi biegga alla váris šattai sutnje stuorra hástalussan.
astrid.helander@avvir.no