Sámi dološ girkomárkanbáiki Ohcejogas
Nuppelogi dološ girkostobu leat ceggejuvvon lahka Ohcejoga girku Máttajávregáttis moadde kilomehtera Gápmasa guvlui. Dáid girkostobuid leat báikeolbmot ceggen alcceseaset vai lea idjadanbáiki go leat Ohcejogas kirkostallamin, márkanastimin dahje gearrehiin. Gearretstohpu lea dál Ohcejoga duojáriid vuovdinstohpu.
– Dát leamašan gearretstohpu ovdal. Dás celke duomuid. Dán seainnis ledje ruovddit ja dasa bidje olbmuid gitta giehtaruvddiiguin. Dás ráŋggáštedje ráippáin sin geat ledje bahádahkkit, na spižáin, lohká Uhca Hánssa Veikko, Veikko Laiti. Miellis leat dievva ovttalanjat stobožat sihke
báiton ja málejuvvon. Veikko Laiti muitala mo guovlu rievddai go geaidnu bođii.
– Dáid stobuin ásse olbmot, maiddái mu áiggi, dát stobut ledje sogaid mielde, lohká ja čujuha iešguđet stobuide ja muitala guđe sohka oamasta maid.
Čujuha nuppe beal áiddi báhpagárdái. Ohcejoga dálá geađgegirku lea huksejuvvon várrevieltái Máttajávrri oarjjabeallái jagiid 1850-1853, ovdal lei muorragirku.
– Dá lea báhppal, na báhpagárdi. 1820-logus lei Jacob Fellmann dáppe báhppa. Lei go son logemat jagi dáppe báhpa. Muittán 1950-logu álggus bohte Vulležat stuorra
fatnasiiguin suga deike márkanbáikái. Sii ihte suga don njárgga duohken guhkes girkofatnasiin. Čiehgahpirat ja sámegávttit ihte. Lei somá oaidnit go suhke dása gáddái. Dás miellis ledje dievva olbmot, muittaša Uhca Hánssa Veikko, Veikko Laiti.
Geassit leat girkostobut rahpas ja lea vejolaš fitnat daid 13 stobu geahččamin go lea Ohcejogas.