TINE spábbačiekčanskuvla Álttás
Álttás lea leamas dán vahkkus TINE spábbačiekčanskuvla. Dán skuvllas mánát hárjehalle čiekčat, oahppat ođđa spábbačiekčangoansttaid ja suohtastallat.
Alta IF ja TINE lágidedje spábbačiekčanskuvlla mánáide gaskkal guhtta ja golbmanuppelohkái jagi Álttás dán vahkku. Spábbačiekčanskuvlla doalut leat heivehuvvon ovdal Álttá-turneringa, ja galget veahkkin čalmmustahttit Álttá-turneringa. TINE spábbačiekčanskuvla galgá maid oažžut mánáid beroštit eambbo spábbačiekčamis.
Okta lágideddjiin, Rune Berger, sávvá spábbačiekčanskuvla lea veahkkin movttiidahttit mánáid čiekčat spáppa. Buot mánát geat serve spábbačiekčanskuvlii ožžo spáppa, seahka, TINE t-báiddi, Tine gálvvuid ja beaiveborramuša maŋemus beaivvi.
Nieiddat lassánan
Spábbačiekčanskuvlii sáhttet oktiibuot 230 máná ja nuora searvat, ja dán jagi nu movt ovddit jagiid, leat 230 máná ja nuora searvan. Rune Berger gii lea okta dáin lágideddjiin muitala dán jagi leat lassánan nieiddat spábbačiekčanskuvlii.
– Ovdal láveje leat eanet bártnit go nieiddat spábbačiekčanskuvllas, muhto dán jagi orrot sullii liikka máŋga nieidda go bártni searvan, ja dat lea hui somá mu mielas, muitala Berger.
Son maid muitala ahte dán jagi leat eanas logijahkásaččat searvan spábbačiekčanskuvlii, mihá eanet go nuoramusaid ja boarrásamosiid joavkkuide.
Spábbačiekčan hárjehallamat
Mánát galget searvat spábbačiekčanhárjehallamiidda guktii beaivái, ja hárjehallamiid gaskkas lea borranboddu. Sin hárjeheaddjit leat Álttá A-joavkku čiekčit, sihke nissonjoavkku- ja dievdojoavkkučiekčit.
– Spábbačiekčanhárjehallamiin galget mánát hárjehallat čiekčat, oahppat ođđa spábbačiekčangoansttaid, oažžut rávvagiid hárjeheddjiin ja sávvamis boktit sin čiekčanmovtta, muitala Berger.
Berger muitala hárjehallamat leat heivehuvvon mánáid agiide ja mánát čikčet heivehuvvon ahkeluohkáin. Boarrásit mánát besset hárjehallat veahá váddásit čiekčangoansttaid, ja nuorabut mánát fas besset čiekčat ja eanet stoahkat spáppain.
Mánnán searván, dál hárjeheaddji
Aurora Johansen lea unnin searvan TINE spábbačiekčanskuvlii, ja lea dál Álttá IF nissonjoavkkus ja vuosttašgeardde TINE spábbačiekčanskuvllas hárjeheaddji. Son muitala su mielas lei unnin nu somá searvat spábbačiekčanskuvlii, ja jáhkká dat skuvla lei mielde váikkuheame su spábbačiekčankarrieara.
– Mu mielas lei unnin hui somá searvat TINE spábbačiekčanskuvlii, ja lea hui somá dál leat hárjeheddjiin dáppe. Mánát orrot nu suohtastallame ja orrot nu liikomin spábbačiekčamii, muitala Johansen.
– Moai letne guokte hárjeheaddji, ja munno hárjehallanjoavkkus leat nieiddažat geat leat riegádan 2010:s ja 2011:s. Mii eanas stoahkat spáppain. Letne mu olbmáin hutkan dábálaš stohkosiid maidda heive váldit spáppa fárrui, ja nu de šaddá spábbastohkosiin, muitala Johansen.
Oktasaš borran
Mánát borret fárrolaga juohke beaivvi, muhto maŋemus beaivvi guossoha TINE nuvttá borramuša mánáide. TINE lea álgán eambbo fokuseret dearvvašlaš borramušaide, ja háliidit guossohit dearvvašlaš beaivebiepmu mánáide geat leat searván spábbačiekčanskuvlii.
Autográfačállin
Gaskavahku loahpahuvvo spábbačiekčanskuvla, ja dát loahpahuvvo autográfačállimiin. Mánát ožžot vejolašvuođa fidnet sin hárjeheddjiid autográfaid. Sihke Álttá IF dievdojoavku, Álttá IF rekrutterenjoavku ja Álttá IF nissonjoavku galget čállit autográfaid sin spábbačiekčanoahpahalliide.
– Šaddá hui somá čállit autográfaid mánáide, somás vásáhus, muitala Johansen.
Litago fille
Buot mánát geat servet ožžot nuvttá TINE gálvvuid, earet eará Litago-juhkosiid. Okta hárjeheddjiin muitala nuoramus mánáid mielas orro Litago jugus eanet gelddolaš go spábbačiekčanhárjehallan, muhto son muitala vel ahte mánát orrot issorasat suohtastallame spábbačiekčanhárjehallamiin.